Comoro – husi loron 17 – 21 Jullu, ho Ir. Lanny Ganda FMA, akompaña ami hodi  reflete kona ba votu pobreza. Momentu ida ne’e sai esperiensia importante atu hafoun no empeña-an liu tan atu atenbrani  pratika empeñu sira ba moris pobre.

Reflesaun sira hahu hodi haree ba Jesus no Kreda dahuluk sira nia pobreza. Hafoin haree mos ba Santo fundadores sira nia sasin pobreza ne’ebe radikal  tamba Maromak nia reinu. Tempu hanesan ami ida-idak mos hili santo/a salesiana sira ne’ebe ho sira nia sasin moris pobreza fó inspirasaun mai ami.  Reflesaun sira  ne’e lori ami atu haree no reflete fali artigo konstituisaun votu pobreza nian ne’ebe ami moris ona durante ne’e iha ami nia esperiensia moris lor-loron nian, iha komunidade no misaun.

Dedika mos loron ida ba laboratorio Ekolojia 5R ( REUSE, REPLACE, RECYCLE,  REPLANT, REDUCE ), visita familia sira ne’ebe prezisa tulun. Formasaun ida ne’e taka ho Lectio Divina husi evanjeliu Mt 6:19-23 kona ba Maromak no rikusoin. Iha selebrasaun nia laran irman ida-idak fahe no oferese empeñu pesoal. Maromak konvida ita atu halibur rikusoin Lalehan nian ne’ebe sei la mohu. “iha fatin ne’ebe o nia rikusoin hela, o nia fuan mos sei hela iha ne’eba”. Obrigada Ir. Lanny Ganda FMA, ba tempu, akompañamentu, reflesaun no esperiensia sira ne’ebe fahe ona ho ami.

(Perpetuande 2022)