Kapítulu online – Ezersísiu espirituál

Mornese –  Iha meditasaun ikus, loron 16 Setembru nian, Mons. Thomas Menamparambil oferese reflesaun kona-ba “Evanjelizasaun”. Nia hahú hodi define sá mak la’ós evanjelizasaun: “Evanjelizasaun la’ós ameasa ida ba liman-rohan kulturál komunidade ida-nian, ba identidade étnika, ba lima-rohan nasionál, ba tradisaun di’ak, ba diversidade antropolójika, ba sapiénsia antiga, ba ligasaun ne’ebé simu nu’udar liman-rohan no ba relasaun familiár eh ligasaun raan nian, ideia sira nu’udar liman-rohan, arketipu sivilizasaun nian no la ameasa mós jéniu relijiozu nativu”.

“Kristu mai – D. Thomas kontinua – atu afirma no foti, kompleta no aperfeisoa, kura no habiit, la’ós atu estraga eh harahun, denunsia eh sobu, nega eh rekuza sasán sira valór nian” (kf Mt 12,18).

Ita presiza aprende husi Jezús  oinsá lori ba oin evanjelizasaun, tanba istória hatudu katak servizu evanjleizasaun nian dalabarak hala’o ho forma ne’ebé hatuun kultura seluk, no ohin loron mós bele sala bainhira la respeita diversidade iha hanoin no hahalok. Nu’udar ezemplu ema Ázia nian valoriza dimensaun kontemplativa, Afrikanu sira afirma aspetu komunitáriu, Osidente sira insiste iha autonomia no dignidade indivíduu nian. La iha vizaun ida ne’ebé kompleta lahó deimensaun seluk, Ita tenke husik ema iha ninia diversidade no ita presiza aprosimasaun oioin atu eduka ema ba fiar”. Modu di’ak liu atu komunika mak moris ho forma ida hodi halo ita-nia moris hamosu pergunta kona-ba signifikadu ikus moris nian.

Nune’e, “evanjelizasaun mak liman ne’ebé belun domin-na’in ida lolo atu tulun; liafuan ida ne’ebé enkoraj no asegura. Modelu servisu misionariu nian mak Jezús no Jezús mak Mensajen.

Mons. Thomas fó konsellu ruma oinsá sai misionária. Uluknanai tama iha ema nia moris, hanesan Jezús halo, hanesan Don Bosco mós halo bainhira nia envolve foin-sa’e sira, labarik sira, família sira, iha estrada, iha uma sira, iha situasaun oioin moris nian: ”Se imi hakarak sai misionária di’ak, imi tenke envolve an iha ema sira nia moris,  haksolok atu simu sira iha imi nia uma, halo sira sente iha uma. Imi mós sei haksolok atu  vizita ema sira nia uma, tam aiha diálogu ho sira, dsikute ho sira kona-ba interese komún; imi sei iha interese ba sira-nia oan sira no sira-nia edukasaun, interese ba sira-nia to’os no kolleita, ba sira-nia problema ekonómiku, sira-nia inserteza, tensaun doméstika no sira-nia babukak dame nian, ba sira-nia problema espirituál no aspirasaun relijioza sira. Imi-nia konversa bele tam iha nivel kle’an liu iha tema sira auto-komprensaun nian kona-ba Maromak nia prezensa iha sira-nia moris. Iha momentu sira ne’e mak Maromak hatudu ninia oin teki-tekir ba ema no komunidade foun sira. No milagre sira akontese”.

Aleinde ne’e, D. Thomas , sujere atu halakon barreira no harii ponte; fó atensaun ba nesesidade sira individuu no komunidade nian; harii futuru ba sira ne’ebé sofre injustisa, utiliza kriatividade, fó resposta ba sira ne’ebé halo pergunta séria.

Hodi refere ba Evanjellu Gaudium, arsebispu  dehan katak presiza hamosu prosesu formasaun-kreximentu ema nian prazu naruk : “prinsípiu ne’e halo ita iha kapasidade atu serbisu ho prazu naruk, lahó obsesaun ba rezultadu imediatu; tulun atu tahan ho pasiénsia situasaun difisil sira, […]. Fó  prioridade ba tempu signifika okupa an atu halo prosesu sira” (EG 225). Misaun saleziana nia espesífiku mak harii futuru foin-sa’e sira-nian, liuliu sira ne’ebé iha desvantajen, nune’e asegura, liuhusi edukasaun futuru ida ba jerasaun foin-sa’e. Tuir D. Thomas, hodi harii jerasaun foun nia futuru ita harii umanidade tomak nia destinu.

Iksumai D. Thomas resalta katak, ema buka profundidade no admira renúnsia, no sai Maromak nia emar tenke sai ema ne’ebé pertense ba ema hotu. Yan ne’e, “relijiozu sira tenke hafoun sira-nia paixaun ba Maromak no ba umanidade; filafali ba abut vida relijioza nian; filafali ba abut sarani no filafali ba abut Fundadór/a nian”.

Iha kalan, irmán kapitulár sira agradese Mons. Thomas no komunidade Mazzarelli nian ba esperiénsia sira halo.

Madre Yvonne agradese Kapitulár ida-idak ba dosilidade ba Espíritu, ba abertura fuan nian no ba dezeju atu moris ho fuan tomak klima Mornese nian no remata nune’e: “Ita fila husi ezersísiu ho serteza ne’e: Maromak la abandona ninia oan sira; Maromak bá uluk ita, Maromak akompaña ita, Maromak hein ita iha foin-sa’e sira, iha kiak sira, iha ema hotu ne’ebé ita hetan iha ita-nia dalan, Mai ita halo sira partisipa iha Moris Foun ne’ebé Nia tranzmite mai ita”.

Konkluzaun retiru nian sei hala’o iha Bazílika Maria Ausiliatrice, Torino, nune’e Madre Jerál nia votus ikus mak atu “Na’i-Feto tulun ita desifra sá loos Maromak nia hakaran mai ita, ba sá loos mak Nia bolu ita iha momentu ne’e no oinsá sai FMA, nia oan-feto loloos, nune’e sai ema sira ne’ebé fó moris!”