Dili – Durante loron lima, husi 11 to’o 15 Jullu, Ir Jacinta Gusmão FMA fasilita formasaun mai ami, Irmán “perpetuande na’in haat”: Cherly, Josefa, Libanha no Olviana ne’ebé prepara an daudaun ba Profisaun Perpétua iha Institutu Filhas de Maria Auxiliadora.

Tópiku formasaun nian mak “Komunikasaun”. Ir Jacinta fomula sesaun komunikasaun nian ho sub-tópiku sira hanesan: komunikasaun intrapesoál no interpesoál; Jezús Kristu, Komunikadór Perfeitu;  Don Bosco no Madre Mazzarello nia estilu komunikativu; Planu Komunikasaun Institutu FMA no Manuál Komunikasaun nian; Liña-gia kona-ba FMA nia prezensa iha rede sosiál; Espresaun no arte ba evanjelizasaun foun.

Modalidade serbisu nian mak tipu workshop, iha-ne’ebé Irmán sira hala’o atividade oioin tuir tópiku ne’ebé sira hakle’an. Entre atividade sira iha jogu, reflesaun pesoál, sharing, serbisu hamutuk ka individuál no halo prátika kona-ba produsaun materiál ba haklaken Evanjellu ka katekeze. Aleinde ne’e iha mós momentu orasaun ne’ebé liga ho tópiku ne’ebé iha.

Ohin, ami nia loron ikus ba formasaun komunikasaun nian ne’ebé ko’alia kona-ba “Espresaun no arte ba  evanjelizasaun”. Durante dadeer ami pratika oinsá atu komunika Maromak nia Liafuan ho kriatividade. Iha modalidade barak atu komunika hanesan arte, múzika, cartoons, teatru, fotografia, produsaun video, multimedia… Maibé, kada komunikasaun ne’ebé ita hakarak hato’o liu husi media sira tenke tuir lia-loos, di’ak no furak. Nune’e ita-nia mensajen bele to’o ba ema no halo ema simu ho ksolok.

Iha kalan ami agradese Ir Jacinta Gusmão ne’ebe akompaña ona ami durante loron lima nia laran, ho aprezentasaun “istória lilin haat”.Lilin haat mak ami ida-idak ne’ebé hakarak sai ho Na’i Jezús no Na’i-Feto nia tulun, roman ba foin-sa’e sira no ema hotu ne’ebé Na’i haruka ami bá to’o ami nia lilin nabeen.

Obrigada ba tempu, matenek no esperiénsia hotu ne’ebé fahe ona ho ami.

(Ir Olviana-Libanha-Josefa-Cherly FMA)