Venilale – Komunidade Maria Auxiliadora Venilale kompostu husi Irman sira, kandidata sira no labarik orfaun sira iha loron 11/07/2022, ho ksolok no entusiamu halo orasaun selebrasaun no rekonsiliasaun hamutuk iha igreja Parokia Sagradu Coração de Jesus Venilale. Durante selebrasaun fo oportunidade ba ema ida-idak hakbesik-an ba sakramentu Rekonsiliasaun.

Loron tuir mai nu’udar komunidade kontinua hala’o ami nia peregrinasaun ba Santuario Maria Auxiliadora Fatumaca.

Peregrinasaun mak sinal ida kondisaun disipulu nian ida iha mundo ne’e, ne’ebé nafatin sai parte importante iha vida kristaun. Peregrinasaun ida ne’e hanesan prosesu konversaun no lori fila relasaun intima ho Maromak no ba nesesidade espiritual Institutu nian tanba peregrina mak aspetu ida ne’ebé bele hetan prezente grasa nian.

Ami nia prosesu ba peregrinasaun mak tuir mai:

Orasaun abertura hamutuk iha Na’in Feto nia oin-komunidade Maria Auxiliadora

To’o iha Gruta entrada Fatumaca nian hahu Tersu peregrinasaun nian

Peregrinasaun remata ho Misa iha Santuario Maria Auxiliadora

Iha homilia amo selebrante padre AntonioTransfiguração dehan : Jesus nia orasaun mak orasaun hahi nian katak fo Gloria ba Maromak tanba hahalok diak ne’ebé Aman hatudu ba Nia no ba mundo. Nune’e atu selebra 150 anos Fundasaun Institutu nian nu’udar konsagrada FMA presiza agradese ba Maromak ba grasa hotu ne’ebé Maromak haraik ona ba Institutu liliu don Vokasaun nian no Misaun nian. Nu’udar FMA ita nia agradesimentu ba Maromak mak kontinua serbi Na’i liu husi Labarik no foinsa’e sira ne’ebé Na’i entrega mai ita atu tau matan.