Baucau – OOhin 10-7-2022 komunidade St. Teresa d’Avila Baucau hala’o atividade konkursu no kampu Madre Mazzarello ho oratoriano sira, OPIAM, grupu Asosiasaun Laura Vicunha, AJA no animador sira iha Eskola Teulale, hodi prepara ba selebra festa 150 anos Institutu FMA eziste iha mundu.

Atividade ne’e hahu ho konkursu hafoin kontinua ho kampu Madre Mazzarello, kada grupu anima husi animador ho oratorianu sira no grupu hirak ne’ebé hola parte iha atividade ne’e, sira mak aprezenta no esplika kona ba Madre Mazzarello nia moris tuir fatin hirak ne’ebé Madre Mazzarello ultrapasa hanesan; hahu husi nia fatin moris Mazzarelli, Borgo Alto, Valponasca, Parókia no Kolejiu. Kada grupu esplika no iha perguntas ba grupu partisipante sira hodi hatan liu husi kreatividade ne’ebé grupu prepara hodi tulun sira atu komprende no haklean Madre Mazzarello nia moris espiritual hahu husi Mazzarelli to’o iha Kolejiu.

Hafoin kontinua ho drama ida kona ba Madre Mazzarello nia moris aprezenta husi grupu oioin no remata ho dansa 150 anos FMA nian. Ho atividade ida ne’e labarik no foinsa’e sira haksolok tebes tan bele koñese Madre Mazzarello nia moris umana no espiritualmente ne’ebé riku ho virtude oioin liu-liu iha domin boot ba Maromak hodi halo buat hotu nafatin hahu ho orasaun no intensaun ne’ebé los. Tempu hanesan sira mós bele koñese malu no fahe talentus ba malu liu husi drama simples no hanesan DB dehan haksolok, halimar, haksoit, naran katak labele halo sala.

ONESIANA FMA