Dili – Komunidade hotu iha FMA TIN oras ne’e hala’o empeñu no atividade oioin atu selebra aniversáriu 150 Fundasaun Institutu FMA nian.

Atividade sira ne’e envolve labarik, foin-sa’e sira, adultu, Família Saleziana. Entre atividade sira ne’ebé propoin ba hotu husi parte espirituál mak renovasaun iha moris konsagrasaun nu’udar FMA hodi estuda, hakle’an no fahe kona-ba dimensaun mariana, trinitária no kristolójika iha Konstituisaun FMA nian, halo selebrasaun rekonsiliasaun, peregrinasaun ba santuáriu marianu sira, koñese Madre Mazzarello hodi hala’o Mazzarello Camp, “certame” ba labarik no foin-sa’e sira; halo kompetisaun seluk ba dansa “I entrust them to you” (tiktok) no dansa “150 aniversário”, poezia, dezeñu nst. Aleinde ne’e ita mós halo promosaun vokasionál no vizita ba família hodi harohan rozáriu liuliu ba fulan rozáriu nian.

Festa ninia loron loloos iha 5 Agostu 2022, maibé tanba ne’e mak jubileu 150 no ita ne’ebé moris selebra dala ida de’it, nune’e  Institutu tomak halo preparasaun tinan tolu nian (Agostu 2019-2020-2021) no remata tinan 2022, taka ho festa S. Francisco de Sale nia aniversáriu mate da-400.

Kona-ba selebrasaun rekonsiliasaun nian, Inspetoria konvida atu halo pasu konkretu rekonsiliasaun nian atu hakbesik ba ema sira ne’ebé ita hakanek iha moris FMA nian. Perdaun no rekonsiliasaun mak fundamentu importante atu bele harii komunidade. Tanba se ita hakarak moris iha komunidade, ita presiza fó perdaun, la’ós dala ida de’it maibé loroloron. Ita presiza fó perdaun nafatin. Bainhira ita perdua ona, ita bele ona selebra.

Komunidade Eusebia Palomino iha loron 2 Jullu 2022, loron retiru mensál,  uza tempu ne’e ba selebrasaun rekonsiliasaun nian. Selebrasaun ne’e nia laran iha mós oportunidade ba hakbesik pesoalmente ba sakramentu rekonsiliasaun, nune’e bele mós prepara an ona ba peregrinasaun ba Santuáriu Marianu ne’ebé sei hala’o iha loron 24 Jullu 2022.

FMA ida-idak, komunidade lokál sira haka’as an atu prepara no selebra tinan 150 fundasaun Institutu FMA nian no iha fulan Agostu sei iha selebrasaun nivel inspetoriál.

(JG)