Venilale – Ohin, 1 Jullu 2022, iha tuku rua loraik, Padre Provinsiál Moçambique, Pe. Adolfo Sarmento SDB misionáriu, mai iha eskola ETV Mazzarello hodi fahe esperiénsia misionariu nian ba estudante ETV, irmán sira no professor/a sira. Iha sorumutuk ne’e padre koalia liuliu ba estudante sira ho pasajen Evanjellu husi S. Mateus nian,” Husik buat hotu hodi tuir Ha’u” mak kondisaun ida tuir Kristu nu’udar foin-sa’e no nu’udar estudante.

Husik buat hotu hodi tuir Kristu nu’udar joven, presiza husik buat ne’ebé la fó ksolok ba ita no mos ba ema seluk ne’ebé dala barak ita la sai prezente furak ba ema seluk ka ba ita-nia maluk sira. Dala barak ho desizaun ne’ebé la loos, halo inan aman no familia terus,. Tan ne’e nu’udar joven hatene husik buat ne’ebé la lori ita ba moris rohan laek. Atu bele husik buat ne’ebé isin nian no mundu nian ita presiza konekta nafatin ho Maromak 24 oras. Tanba dala barak ita fiar iha ita-nia kbiit, ita- nia matenek no ita-nia susesu hodi la tau fiar iha Kristu ne’ebé sai ita-nia Dalan, Lialoos no Moris. Hafoin Padre aprezenta S. Domingos Savio, B. Carlo Acutis, S. Margarida Alaquoque no S. Faustina hodi dehan katak; sira ne’e mak ema hirak ne’ebé online 24 oras ho Maromak iha sira-nia moris liu husi sira-nia Vizita pesoal, adorasaun no partisipasaun Eukaristia.

Hafoin hatán ba estudante sira-nia pergunta kona-ba esperiénsia misionáriu nian, padre hatán katak atu sai misionáriu presiza haraik-an, laran badinas iha hakarak atu aprende kultura foun no lian foun liuliu lian domin nian no lian Evanjellu nian. Ikus liu Padre fó hela Lia menon ba foinsae sira haka’as an atu sai prezente diak ba ema seluk no koko deskobre Maromak nia hakarak atu kolabora ho irmán sira no padre sira taumatan no fó mós imi nia moris ba imi-nia maluk foinsae sira.

(A;ice Filipe FMA)