Dili – Formasaun kontínua importante iha estadu moris hotu no iha profisaun sira. Nune’e mak, Irmán sira konsellu no animadora komunidade nian husi Timor-Leste no Indonesia, ohin, 28 Juñu, hetan oportunidade atu hala’o enkontru formativu fasilita husi Padre Dibyanto SI, ne’ebé aprezenta tema “akompañamentu iha formasaun”.

Iha ninia aprezentasaun, padre Dibya hahú hodi halo distinsaun entre tipu sira akompañamentu nian iha business; iha Post-disaster situations;  clinical no formasaun nian.

Akompañamentu mak nesesidade ida iha ema nia dalan ba prezensa ida ne’ebé bele tulun la’o di’ak liu iha nia dalan tuir vokasaun ne’ebé Maromak haraik ba nia. Akompañamentu iha formasaun konsiste iha “coloquium, prosesu formativu no diresaun espirituál”. Iha “coloquium” formadór/a aprezenta estrutura, programa no prosesu, no haree indikadór sira tuir formasaun nia orientasaun sira; iha ‘formative processing’, trata problema no difikudade sira formasaun nian, identidade, integrasaun iha komunidade, apostoladu no internalizasaun valór sira-nian; iha diresaun espirituál, tulun formande deskobre Maromak nia asaun iha nia an, atu hatán ho livre no kriativu no domin.

Finalidade prosesu formativu nian mak habiit formande sira atu bele hola parte boot liután iha sira-nia formasaun; livre iha hahalok no modu hahalok sira-nian, nakloke ba ema seluk, nakloke ba Maromak no disponivel ba misaun ho kompromisu.

Maibé atu akompaña ema presiza iha estrutura ka orientasaun formasaun nian, focus no prosesu; presiza mós iha métodu no sasukat, no abilidade sira akompañamentu nian hanesan rona, empatia, ba kle’an. Maibé importante mós atu akompañadór/a iha esperiénsia pesoál akompañamentu nian.

Depoizde aprezentasaun sira kona-ba modelu sira akompañamentu nian, Padre Dibyanto fó pergunta ruma atu Irmán sira rasik halo reflesaun kona-ba oinsá sira-nia esperiénsia pesoál akompañamentu nian no oinsá sira rasik nia esperiénsia nu’udar akompañadora.

Depoizde tempu ruma reflesaun pesoál nian, Irmán sira halo partilla ba malu sira-nia esperiénsia pesoál no dezafiu sira ne’ebé sira hasoru atu hadi’ak an rasik no atu bele tulun Irmán sira seluk ne’ebé sira hetan knaar atu akompaña.

Iha parte loraik Irmán sira ho Provinsiál trata kona-ba programasaun ba festa aniversáriu tinan 150 fundasaun Institutu FMA nian hodi nune’e, hotu-hotu bele hamanas an liután atu selebra no hafoun moris nu’udar FMA.

Molok fahe malu, Ir Alma hato’o lia-menon foti husi Paolo Maldini treinadór futeból nian ne’ebé dehan katak “leader nia podér implísitu, no nia autoridade rezultadu husi respeitu no konfiansa ba malu… leader tau matan no tulun atu sai buras, harii relasaun konfiansa nian hodi fahe susesu no frakeza sira. Leader iha knaar atu haburas paixaun iha ninia ema sira.”

(JG)