Padre Salvatore Maria Perrella:  Nia fó hanoin ba “Jezús nia testamentu” iha João, Na’i-Feto, ne’o ó-nia oan

Hahalok ida ne’ebé nia tau abut sira iha Evanjellu. Populár, ho simplisidade ne’ebé halo sai besik ba Maromak. Padre Salvatore Perrella, mariólogu italianu ida, fó atensaun ba risku atu banaliza ka la valoriza, atu hateke ho superioridade ba Amu-Papa nia jestu hodi konsagra umanidade, liuliu Ukraina no Rússia ba Maria nia futar Fuan Sala-Laek. «Era sibernétika nian, primadu siénsia liufali kompaixaun la kansela hahalok piedade sira-ne’e ne’ebé hakat liu tempu no kongruente, iha-ne’ebé kombina ‘pathos’ no karidade, espresaun fiar maka’as iha Maromak nia domin ita Aman, nafatin no ba nafatin».

Ita dirije ba Virjen Maria, tanba lori ita ba Maromak.
Na’i-Feto mak Na’i nia atan, kriatura ‘Trinitatis’. Ne’e duni, jestu hotu ita dirije ba nia ne’e dirije ba Kristu, ho Kristu no iha Kristu. Ho Batizmu ita hotu konsagra an ba Maromak. Maria intersede atu paternidade divina bele habelar ba kriatura hotu.

Jestu ne’ebé Amu-Papa hafoun iha orijen antiga.
Iha linguajen pastorál no kanóniku ko’alia kona-ba entrega, konsagrasaun, dedikasaun ba Maria. Sira-ne’e mak tradisaun prezente iha Kreda latina husi inísiu kedas, natón atu hanoin ba S. Ildefonso de Toledo iha sékulu VII. Neineik-neineik, iha Kreda katólika nia istória dezenvolve tan forma sira seluk, hanesan oblasaun iha sékulu XVII no eskravidaun mariana. Ka espiritualidade “cordimariana” (Maria nia fuan) iha sékulu XIX ho Santu António Maria Claret fundadór Missionáriu Fuan Imakuladu Maria nian. Ka seluktán, Milísia Imakulada S. Maximiliano Kolbe nian.
Jestu konsagrasaun ne’ebé Amu-Papa halo iha 25 Marsu 2022, fó hanoin kedas ba Fátima no ba Na’i-Feto nia pedidu, iha 13 Jullu 1917, atu konsagra Rússia ba ninia Fuan Sala-Laek.
Iha memória dahaat aparisaun sira-nian, Ir Lúcia fó hanoin kona-ba Virjen Maria nia pedidu, ne’ebé ko’alia kona-ba Kristu nia fuan ne’ebé komunizmu trata aat, kona-ba Rússia nia konsagrasaun no komuñaun reparadora iha primeiru sábadu sira fulan ida-idak nian.
Na’i-Feto Virjen Maria nia konvite hetan resonánsia maka’as iha Kreda iha tinan sira 1900 nian, liuhusi “atu konsagrasaun nian, dedikasaun nian husi komunidade sarani oioin, husi movimentu espirituál sira, husi konfraternizasaun sira no, liuliu husi Amu-Papa sira, hanesan Papa Pio XII, Papa João XXIII, Papa Paulo VI.

Papa João Paulo II konsagra mundu ba Maria nia futar Fuan Sala-Laek iha 13 Maiu 1982 iha Fátima no iha 25 Marsu 1984 iha Roma ho hahalok kolejiál ne’ebé repete solenemente iha prasa S. Pedro iha 8 Outubru 2000 durante “Grande Jubileu”. João Paulo II manifesta “atu piedade populár”, konsagrasaun, ne’ebé tau nia abut iha João 19, 25-27, iha Jezús nia testamentu, ne’ebé foti Maria nu’udar Kreda no umanidade nia innan: «Na’i-Feto, ne’e ó-nia oan». No ba eskolante: «Ne’e ó-nia inan».

Ikusmai, Papa Francisco
Papa Francisco devotu boot liu Maria nian, ho piedade pesoál maka’as no la’ós banál, hakarak iha sintonia ho Virjen Santa nia hakaran hato’o liuhusi bibi-atan ki’ik-oan sira Fátima nian, maibé se Pio XII, Paulo VI, João Paulo II iha sira-nia atu konsagrasaun (acto) la halo, Papa Francisco temi Rússia nia naran, hodi aumenta Ukraina. Rússia la’ós apóstata, la’ós ateia, husi 1917 to’o muru Berlin monu, la iha ona sistema komunizmu. Prezidente Putin rasik, indivíduu perigozu ida-ne’e, hanaran nia an sarani, bá uma-kreda, padre Salvatore subliña.
Iha Fátima, Maria hatudu nia an  nu’udar inan iha nia Oan ne’ebé hedi iha krús no moris-hi’as, liuliu iha momentu dramátiku sira la’ós de’it ba Ukraina maibé mós ba Rússia. Maria mak “mater umanitatis”, ne’e mak mensajen husi Fátima.