Saun Luís Gonzaga (1568-1591) bainhira tinan 9, nia aman Don Ferrante Gonzaga lori nia ho nia alin Rodolfo iha korte Liurai Toscana nian. Providénsia uza tinan rua nia moris nian iha Firenze atu halo nia avansa iha dalan santidade nian. Depoizde leitura ida kona-ba mistériu sira Rozáriu nian, hamoris iha nia devosaun ba Maria Santíssima, ne’ebé kontribui mós ba devosaun ba Na’i-Feto Anunsiasaun nian, ne’ebé hetan venerasaun iha sidade ne’e. Nune’e iha uma-kreda “Santissima Annunziata”, nia halo votu virjindade iha 15 Agostu 1576, loron Asunsaun Na’i-Feto nian.

Iha 15 Agostu 1583, ho tinan 15, nia vokasaun sai tasak. Iha Madrid (España), iha uma-kreda Koléjiu Jezuita sira-nian, iha “Na’i-Feto Susesu Di’ak” nia ilas nia oin, ne’ebé tuirmai hanaran “Na’i-Feto Konsellu Di’ak nian (Mãe do bom conselho), nia konsagra an ba Na’i-Feto no renunsia kedas ninia direitu atu sai markés.

Bainhira iha orasaun Luís agradese hela ho modu devotu ba Maromak no harohan liuhusi intersesaun Na’i-Feto Susesu Di’ak nian atu hatudu ninia vokasaun no konverte nia aman ne’ebé lakohi niasai relijiozu, nia rona lian ida momoos ne’ebé ko’alia. Lian ne’e dehan ba nia atu sai relijiozu iha Kompaña Jezús nian (Jezuita sira).

Iha 25 Novembru 1585 Luís Gonzaga ho tinan 17 tama iha novisiadu jezuita sira-nian iha Roma ho nia aman nia konsentimentu.