Venilale –  Iha loron 18 Juñu, Irmán sira komunidade rua iha Venilale hala’o atividade ba selebrasaun tinan 150 fundasaun Institutu nian. Atividade hirak ne’e mak; fó formasaun espírituál bazeia ba Madre Mazzarello nia moris, sertame no dansa Tiktok.

Formasaun Espírituál ba Eskola Sekundária Jerál Venilale nian, hahu ho Buongiorno ne’ebé fó husi Ir. Carolina Correia FMA, iha ne’e Irmán hateten katak formasaun ida ne’e ho objetivu tolu; ba dala uluk, atu hamutuk ho ami Irmán FMA sira iha mundu tomak agradese ba Maromak ba tinan 150 ezistensia Institutu Filhas de Maria Auxiliadora iha mundu. Daruak, mak atu agradese ba santidade Madre Mazzarello nian iha Institutu nian moris, no ikus fó konesimentu konaba Santa ida ne’e imi bele moris tuir ninia atitude balun iha imi nia moris. Nune’e iha tuku 9:30 to’o tuku 12: 00 grupu dahuluk; iha tuku 13: 45 to’o 15: 30 grupu daruak ne’ebé literally husi Antigas Alunas sira; Prof. Candida Belo, Prof. Filomena Sousa Prof. Bemvinda no kolabora ho Profesor/a sira iha eskola; Prof. Ana Berta, Prof. Rita, Ir. FYJM Berkoli no Prof. Manuel Alfredo. Estudante hamutuk 764 no formadór sira hamutuk 12. Sala ida idak formador na’in 4. Atividade ida ne’e suporta maka’as husi diretór eskola Mestre Alcino Do Santos, Koordinadór estudante no professor/a sira hotu nia kolaborasaun ne’ebé di’ak tebes. Estudante partisipa ho di’ak tebes. Formadór sira tuir matadalan ne’ebé fó husi ekipa no nivel Ispetorial prepara hafoin aprezenta ho kriatividade no jogus iha laran bazeia ba Madre Mazzarello nia moris iha manual.

Hafoin iha tuku 10:00 Eskola Téknika Vokasionál Madre Mazzarello Venilale mós hala’o sertame entre klase – klase molok kompete ho eskola sekundária sira seluk iha Venilale no kontinua kedas ho kompetisaun dansa Tiktok mós entre klase-klase.

Nune’e mós iha oras 14:30, realiza mós sertame ba Ensinu Báziku segundu síklu sira iha Venilale iha komunidade Madre Mazzarello. Eskola sira ne’ebé partisipa iha sertame ne’e mai husi Ensinu Báziku Filial Hatu-Haco- Venilale, Ensinu Báziku Católica S. Cristovão Venilale, Ensinu Báziku Osso-Hula no Ensinu Báziku Wai-cana. Ikus mai sai manan na’in iha sertame mak Ensinu Báziku Osso-Hula.