Kaben-na’in ba Kristu maka movimentu internasionál ida atu hafoun família sarani nia moris. Membru sira iha kompromisu ho Na ’i no ba malu atu buras iha maturidade nu’udar mane no feto no realiza sira nia vokasaun mahuluk atu haburas família sira ho Jezús Kristu nu’udar Na’i no serví Maromak nia Reinu.

Sira-nia vizaun maka família sira iha Espíritu Santu nia kbiit bele hafoun mundu. Misaun maka harii kreda doméstika, harii Kreda kiak sira nian. Nu’udar objetivu iha haat: evanjelizasaun no formasaun, renovasaun família nian, libertasaun totál sarani nian.

 

Atu bele to’o ba mehi no objetivu sira, meiu ida mós forma oan sira, nune’e iha mós “Labarik ba Kristu” (husi tinan 4-12) , “Joven ba Kristu” (husi tinan 13-21)  no “Klosan ba Kristu” (tinan 21-40).

“Joven ba Kristu” iha vizaun atu sira sai hanesan Kristu no lori Kristu iha fatin ne’ebé sira horik bá. Sira-nia grupu buras iha parókia sira no sira iha formasaun semanál Hafoin tinan ida dala ida halo kongresu nasionál. Nune’e maka iha loron tolu nia laran husi 24-26 Agostu “Joven ba Kristu” halo sira nia enkontru anuál iha Dili, iha eskola 30 de Agosto (Comoro). “Joven ba Kristu” feto no mane hamutuk 900 halo sira nia reflesaun ho tema jerál “Kbiit-Na’i”. Tema ne’e kontinuasaun kongresu anuál ne’ebé hala’o ona ba dala neen: 1)  Ha’u fiar (tinan 2007); 2) Fó sasin (2008); 3) Hakat ba Kristu (2009); 4) To’o rohan (2010); 5) Bá manán armada no prontu (2011); Kbiit-Na’in (2012). Enkontru hotu bazeia ba Maromak nia Liafuan sira.

Iha palestrante barak maka fahe ho joven sira ne’e hodi dezenvolve tema jerál. Hanesan tema tinan ne’e nian sujere, sira reflete no fahe esperiénsia kona-ba oinsá Maromak ne’ebé Kbiit-Na’in halo buat hotu iha sira-nia moris pesoál no iha mundu. Iha loron dahuluk seminarista ida Nando fahe nia esperiénsia oinsá husi foin-sa’e “muturabu” ida hodi eperiénsia iha grupu “Joven ba Kristu” nia troka nia moris no hahú halo dalan vokasaun nian.

Loron daruak dedika ba input oioin husi palestrante oioin. Ir Lucia FMA lori tema kona-ba Moris tuir itineráriu fiar Maria nian. Nia aprezenta ba sira oinsá Maria, feto-raan ida deside atu loke an ba Maromak nia planu no husik nia halo buat kmanek oioin iha nia moris. Ir. Hermelinda Silva FMA mós anima kongresu ne’e iha parte ida kona-ba situasaun feto sira-nian, neebé partisipante feto de’it. Husi sharing kongresista sira-nian, nia lori sira atu hatene sai fiar-na’in ho kbiit atu hasoru dezafiu sira sosiedade ohin-loron nian, hodi indika mós feto modelu ruma fiar-na’in ne’ebé barani saran sira-nia moris ba sira nia fiar.

Mane sira fali hasoru malu ho padre Ferdie SVD kona-ba tema sai mane asaun nian.

Loron ikus ramata aban ho Eukaristia selebra husi Dom Basílio do Nascimento, bispu Baucau nian no prezidente Konferénsia Episkopál Timor-Leste nian, no sesaun ida tan kona-ba Haklaken Maromak nia kbiit, nu’udar mandatu ikus ba kongresista no membru sira ““Joven ba Kristu”” nian.