Ksolok mak marka típiku karizma salezianu nian. Oinsá mak ita simu Ezortasaun Apostólika Amu-Papa nian “Evangelii Gaudium?”

Ksolok ne’ebé Amu-Papa refere mak ksolok Liafou-Di’ak nian, husi Maromak ida ne’ebé halo an fraku hanesanita, hanesan labarik. Ne’e mak manifestasaun aas liu Maromak nia domin nian, ne’ebé halo an ki’ik atu sai ema hanesan ita nune’e foti sa’e ita ba dignidade nia oan sira-nian. Maromka de’it mak bele hanoin ba mudansa radikál ida hanesan ne’e mentalidade umana nian. Tanba ne’e mak ita labele la evanjeliza, tanba ne’e mak mak ita tenke sente iha ita urjénsia apostólika atu komunika ba ema seluk, ho modu partikulár ba foin-sa’e sira, ksolok no fafurak fiar nian ne’ebé mai atu fó sentidu, esperansa no futuru ba ita-nia moris no ba ita-nia empeñu kolaborasaun ba konstrusaun  mundu ida di’ak liu ba ema hotu, liuliu sira ne’ebé kiak liu, iha desvantajen no iha ninin.

No sá loos mak kona ita ho modu partikulár husi testu ne’e?

Testu ne’e mak dokumentu esezionál ida, ne’ebé hasai la’ós naranaran de’it iha Tinan Fiar nia rohan ne’ebé Bento XVI hakarak atu hanoin Konsíliu ne’ebé ho modu providensiál hafoun Kreda. Dokumentu ne’e moris husi Francisco nia fuan, bispu Roma nian, rezultadu husi esperiénsia pastorál iha liña dahuluk no ninia meditasaun naruk kona-ba urjénsia haklaken Evanjellu ba mundu ohin nian.

Dokumentu ne’e iha sintonia perfeita ho konteúdu no intervensaun sira nia halo ni ho ninia estilu pesoál. Papa Francisco afirma katak nia la iha intensaun atu hakerek tratadu teóriku ida maibé atu hatudu katak buat ne’ebé importante mak argumentu sira-ne’e bele kona vida prátika. Nia objetivu presizu liu: tulun trasa estilu determinadu evanjelizasaun nian no asume nia iha atividade ida-idak ne’ebé realiza.

Ih asintonia boot ho Ezortasaun inkomparavel “Evangelii Nuntiandi” Paulo VI nian, ne’ebé títulu rasik fó hanoin, no karik husik atu fuan ko’alia, testu foun ne’e mak charta magna ida ba Kreda ohin nian, ho signifikadu programátiku ida no ho konsekuénsia fundamentál, tanba la’ós posivel atu husik buat sira hanesan uluk nian no presiza hela nafatin iha estadu permanente konversaun no misaun nian.

No ba Kongregasaun Saleziana, iha espesífiku, sá mak Evangelii Gaudium komunika?

Ha’u hanoin katak Papa Francisco nia Ezortasaun Apostólika tau ita iha klima Kapítulu Jerál nian, ne’ebé nesesariamente no providensialmente hetan naroman husi testu programátiku ne’e. Nia aprezenta mai ita vizaunida oinsá Kreda tenke sai: la ta’uk mundu modernu, Kreda ne’ebé buka forma foun atu haklaken Evanjellu, sai misionária liután, laran-sadia liután, aten-barani liután atu halo mudansa nesesária hotu.

Kreda ida ne’ebé manán ta’uk atu sai husi estrutura rasik no akon ninia seguransa falsa sira, ne’ebé ikusmai halo ita sai ríjidu no evanjelizadór ladún efikás. Kreda ida ne’ebé hatene denunsia modelu ekonómiku ida ne’ebé halo osan nu’udar maromak falsu ida, ne’ebé hamosu ezkluzaun sosiál no kria kultura ida soe no indiferensa nian. Kreda ida ne’ebé iha predilesaun espesiál ba kiak sira no empeñu ho desizaun ba justisa sosiál no dame.

Iha pontu ne’e ha’u husu atu imi lee, estuda no halo ema koñese Ezortasaun “Ksolok Evanjellu nian”, halo nia sai objetu rasaun nian, husik nia hamanas fuan no, liuliu, tau fali ita iha dalan nakonu ho ksolok atu lori mensajen ksolok nian ba foin-sa’e sira.