Venilale – Iha  Solenidade Corpus Christi nian, ami komunidade Maria Auxiliadora hamutuk ho parokianu sira iha Parokia Venilale selebra ho maneira espesiáll tanba iha labarik na’in 62; entre sira ne’e orfaun sira hamutuk na’in 14, simu Jezus Nia Futar Isin no Ran ba dala uluk.

Iha omilia padre Adolfo Sarmento SDB dehan: Festa ida ohin nian mak Festa han hemu nian tanba ne’e atu han hemu ho diak presiza preparasaun ne’ebe diak maibe hahan ne’ebé la’ós fo bosu deit ba isin maibe hahan ne’ebe fo bosu ba klamar, ba hanoin no ba fuan. Wainhira joven riku hakbesik husu ba Jezus: Mestre halo saida atu hetan moris rohan laek ? O kumpri Maromak nia Ukun Fuan katak hadomi Maromak no hadomi maluk sira, maibe hahan seluk ita mos buka atu fo han ba ita nia klamar. Festa ohin nian mak festa Na’i Jezus nakfilak Nia An hanesan Ai-han moris ba ita nia moris rohan laek. Jezus tun mai rai liu husi Na’i Feto iha rai Belem katak uma paun nian, Jezus tun mai halo An nu’udar Paun ba ita hotu ne’ebé haklaken fiar iha Nia.

Iha Evanjelho ne’ebé ita rona Jezus nakfilak Nia An ba Paun no Tua; Paun ne’ebé fo moris rohan laek ba ita nia klamar no isin espritual tanba ita ema lao rai presiza lori hahan spiritual atu tulun ita atu metin nafatin ba ita nia fiar. Nu’udar sarani wainhira ita simu Kristu nia Futar Isin no Ran ita hatutan nafatin Kristu nia Terus, Mate no Moris hias no moris rohan laek iha ita nia dalan fiar nian no iha kreda.

Molok simu bensa final padre paroku, padre ko-selebrante sira hamutuk ho sarani sira halo prosisaun ho Jezus nia Isin haleu Parokia Venilale.

(Domingas FMA)