Dili – Loron solenidade Corpus Christi, 16 Juñu 2022, iha Dili depoizde tinan 2 coronavirus impoin lockdown, bele fali selebra iha públiku hodi lori Kristu nia futar Isin iha prosisaun. Prosisaun hahú husi parókia Balide bá to’o Jardín Lecidere iha monumentu Imakulada Konseisaun nia oin.

Sarani wain manifesta sira nia domin, respeitu, adorasaun, hahí no gratidaun ba Na’i Jezús nia futar Isin iha Santíssimu Sakramentu. Estudante barak husi eskola katólika, grupu kategoriál sira, relijioza ho formande sira nune’e mós relijiozu sira. Se tinan kotuk Jezús mak sai bá buka sarani sira iha konfinamentu, ema moras sira iha ospitál no sentru izolamentu covid-19, tinan ne’e sarani sira mak lori Na’i iha prosisaun.

Tema orasaun nian liga Eukaristia no kriasaun ka ekolojia, tuir programa 2022 dioseze nian.

Depoizde prosisaun tuir kedas ho adorasaun ba Santíssimu no liturjia Liafuan nian. D. Virgílio da Silva SDB halo omilia hodi liga Eukaristia ho ekolojia. Nia sita Papa Francisco nia ensíklika hodi konvida sarani sira ba atitude eukarístiku, agradese ba kriasaun ne’ebé Aman hakiak no entrega ba ema atu tau matan. “Iha Eukaristia mak buat hotu ne’ebé Maromak hakiak hetan ezaltasaun aas liu hotu. Grasa sai tanjiível bainhira Maromak rasik sai ema, sai paun ba nia kriatura sira”.

Ema nia kaan-teen halo nia esplora no estraga kriasaun envezde kuidadu.  Atitude kuidadu hanesan hamoos no la soe lixu arbiru, sei lori benefísiu ba ema, selae sei akontese tan inundasaun hanesan 4 Abríl 2021.

Bispu konvida mós edukadór/a sira, aman-inan sira atu eduka oan sira ba kuidadu kriasaun nian, ba rona no hatán ba rai nia hakilar.

Selebrasaun remata ho Bensan Santíssimu Sakramentu nian ba asembleia tomak.

(JG)