Venilale – Iha loron 11/06/2022 loraik, iha Orfanato São Domingos Sávio-Venilale, labarik orfaun sira hamutuk ho irman no kandidata sira haksolok tebes tanba simu vizita husi Inspetor jeral do jogu husi Ministério Turismo Komersiu e Industria nian: senhor Domingos Guterres ho nia ekipa. Objetivu ba vizita ida ne’e mak komisaun hakarak atu loke liras liutan ba alin oan sira hanesan iha orfanatu hodi haluan sira nia misaun no vizaun husi servisu refere iha ita nia rain doben Timor-Leste no liu-liu relasiona ho loron ne’e komisaun selebra tinan 14 Inspesaun Jeral do jogu nia existensia; Tanba ne’e komisaun hakarak selebra festa ida ne’e ho labarik sira ho prezensa artista Timor nian hanesan Pepe Rego hodi anima labarik orfaun sira ho kanta, dansa no animasaun ksolok nian.

Nu’udar komunidade ami agradese wa’in ba ita bo’ot sira nia prezensa ksolok no domin nian liuliu ami apresia ba ita bo’ot sira inisiativa no esforsu hodi to’o mai haree diretamente ami nia realidade iha Orfanatu ida ne’e. Obrigada wa’in ba ita bo’ot sira nia vizita ami akompana imi ho ami nia orasaun no boa kontinuasaun ba imi nia servisu sira.

(Domingas FMA)