Jezús ko’alia ba Santa Margarida Maria Alacoque (1647-1690)

“Ba ema hotu ne’ebé, iha fulan sia tutuir malu komunga iha loron sesta dahuluk fulan nian, ha’u promete grasa perseveransa finál: sira sei la mate iha ha’unia desgrasa, maibé sira sei simu Sakramentu Santu sira no ha’u-nia Fuan sei sai sira-nia subar-fatin iha momentu ikus ne’e”.

Jezús nia promesa ba ninia devotu sira, bainhira nia mosu ba Santa Margarida Maria Alacoque no hatudu nina futar Fuan:

1. Ha’u sei haraik ba sira grasa hotu sira presiza ba sira-nia estadu moris nian
2. Ha’u sei tau dame no hametin dame iha sira-nia família
3. Ha’u sei konsola sira husi sira-nia terus sira hotu
4. Ha’u sei sai sira-nia abrigu seguru iha moris liuliu iha pontu mate nian
5. Ha’u sei haboot ho bensan naresin iha sira-nia haka’as an hotu
6. Ema maksalak sira sei hetan iha ha’u-nia Fuan bee-matan no oseanu rohan-laek mizerikórdia nian
7. Klamar morna sira sei sai manas
8. Klamar manas sira iha tempu badak sei to’o ba perfeisaun boot
9. Ha’u-nia bensan sei mós tun ba uma sira iha-ne’ebé espoin no fó onra ba ha’u nia Fuan nia ilas
10. Ba amlulik sira ha’u sei fó grasa atu hamamar fuan sira ne’ebé toos liu
11. Ba ema sira ne’ebé habelar devosaun ne’e, sei iha sira-nia naran hakerek iha ha’u-nia Fuan no nunka bele halakon.

Kondisaun sira:

1. Hakbesik ba Komuñaun. Komuñaun ne’ebé halo di’ak, katak iha Maromak nia grasa; nnune’e, se iha sala mortál nnia laran, tenke hakbesik konfisaun.
2. Ba fulan sia tutuir malu. Nune’e se karik hahú ona Komuñaun no hafoin haluha, moras, nst, tenke hahú hikas fali.
3. Loron sesta dahuluk fulan-fulan nian. Bele hahú iha fulan naran de’it.

 

Maria nia futar Fuan Sala-Laek

Kona-ba devosaun ba Maria nia futar Fuan Sala-Laek – Devosaun ba Sábadu Lima Dahuluk fulan nian – presiza haktuir buat ne’ebé Na’i-Feto dehan bainhira mosu iha Fátima, iha loron 13 Juñu 1917, entre buat barak seluk ne’ebé nia hateten ba Lúcia:

“Jezús hakarak uza ó atu halo ema koñese no hadomi ha’u. Nia hakarak estabelese iha mundu devosaun ba ha’u-nia Fuan Sala-Laek”.

Hafoin, iha aparisaun ne’e, nia hatudu ba vidente na’in tolu ninia Fuan ho koroa ai-tarak nian: Fuan Sala-Laek Inan nian ne’ebé triste tan oan sira nia salan no tanba sira lakon ba nafatin!

Lúcia haktuir: “Iha 10 Dezembru 1925 Virjen Santíssima mosu iha ha’u-nia kuartu no iha nia sorin iha Meninu, hanesan iha kalohan leten. Na’i-Feto tau nia liman iha nia kabaas no, iha liman seluk kaer Fuan ida ho ai-tarak haleu fuan ne’e, Iha momentu ne’e Meninu dehan:

“Iha kompaixaun ba Ó nia inan Santíssima nia Fuan ne’ebé falun ho ai-tarak sira ne’ebé ema laran-makerek sira kontinua tu ba nia, enkuantu la halo hahalok reparasaun nian atu fokit sai sira”.

No Na’i-Feto hatutan kedas:

“Haree mai,  ha’u oan-feto, ha’u-nia Fuan ho ai-tarak haleu ne’ebé ema laran-makerek sira kontinua tau ho lia-tolok no ingratiduan. Ó fali oelumenus konsola netik ha’u no halo ema hatene kona-ba buat ne’e: Ba sira hotu ne’ebé durante fulan lima, iha sábadu dahuluk, si akonfesa, simu santa Komuñaun, hodi harohan Rozáriu no  hamaluk ha’u ba minutu sanulu-resin-lima hodi medita Mistériu sira, ho inensaun atu oferese reparasaun mai ha’u, ha’u promete atu asiste sira iha oras mate nian ho grasa hotu ne’ebé sira presiza ba salvasaun”.

Tanba ne’e, mai ita konfia an ba Maria nia futar Fuan Sala-Laek! Maromak hili atu mundu iha tempu dame nian – maski tenke hakat liu provasaun no tribulasaun forte, ne’ebé hahú tiha ona: iha Kreda no ih aumanidade tomak – liuhusi Fuan Sala-Laek nia Triunfu!

No ida-ne’e mak promesa boot Maria futar Fuan nian ne’ebé la’o hamutuk ho promesa husi Jezús nia futar Fuan.

Atu hetan promesa husi Maria nia futar Fuan presiza kondisaun sira tuirmai:

1. Konfisaun, halo loron ualu molok, ho intensaun reparasaun ba ofensa sira halo hasoru Maria nia futar Fuan Sala-Laek. Se ema ruma iha konfisaun haluha atu tau intensaun ne’e, bele fó sai iha Konfisaun tuirmai.
2. Komuñaun, halo iha Maromak nia grasa no intensaun hanesan konfisaun nian.
3. Tenke halo Komuñaun iha sábadu dahuluk fulan nian.
4. Konfisaun no Komuñaun tenke repete ba fulan lima tutuir malu, lahó interupsaun, se lae tenke hahú hikas fali.
5. Harohan Rozáriu ho intensaun hanesan konfisaun nian.
6. Meditasaun kona-ba mistériu sira Rozáriu nian ba minutu sanulu-resin-lima hodi hamaluk Virjen Santíssima.

Lúcia nia konfesór husu tanba sá númeru lima. Nia husu ba Jezús, ne’ebé hatán:

“Ne’e kona-ba reparasaun ba ofensa lima nee’bé halo ba Maria Sala-Laek nia futar Fuan:

1. Tolok ka ko’alia aat hasoru ninia Imakulada Konseisaun.
2. Hasoru niia Virjindade.
3. Hasoru ninia Maternidade divina no lakohi rekoñese nia nu’uda umanidade nia Inan.
4. Ema sira nia hahalok ne’ebé ho modu públiku habelar iha ki’ik-oan sira nia fuan infdiferensa, desprezu no até ódiu hasoru Inan Imakulada.
5. Ema sira nia hahalok ne’ebé ofende diretamente ninia imajen ka ilas sagrada sira”.