Autentisidade: aptidaun ida ne’ebé halo ita manán? Sai espontánea, sai auténtika mak aptidaun pozitiva ida ka lae?

Saida mak autentisidade? Autentisidade ne’e besik ba espontaneidade? Se ita konsidera autentisidade nu’udar rekoñesimentu an rasik nian no espresaun ba parte ida an rasik nian iha mundu lahó mistifikasaun entaun liafuan rua ne’e besik malu. Iha tempu ida ne’ebé ema ida-idak iha posibilidade atu harii ninia vitrina/“etalase” (armáriu vidru atu faan sasán), imajen públika ida, hanesan ida social network oferese, autentisidade ne’e aptidaun ida ne’ebé fó lukru?

Karik ita presiza hakle’an saida mak signifikadu sai auténtiku no liuliu konsidera katak iha ótika komunikativa autentisidade mós tenke sura mós ho ita-nia públiku nia “feedback” katak, sira apresia eh lae buat ne’ebé sira haree, eh bele mós interpreta sala ita-nia komportamentu no mensajen sira.

Ita buka definisaun ida

Oinsá define autentisidade? Katak komunika lahó “filter” eh filtru sira, dehan buat hotu hodi la hanoin ba konsekuénsia sira? Aprosimasaun ida-ne’e tau énfaze iha autentisidade nu’udar atitude dirije ba li’ur, kona-ba saida mak ita komunika ba mundu. Sai auténtiku mak uluknanai atitude interiór” ida no refere ba koñesimentu kle’an kona-ba an rasik: aseitasaun naroman no nakukun sira, lahó máskara sira no lahó justifikasaun sira. Sai auténtiku mak dalan ida, itineráriu ida, ita la hanoin maibé difisil uitoan, tanba ita matenek liu atu justifika eh fó razaun ba komportamentu sira, hanoin sira, akontesimentu sira ne’ebé la korresponde ho opiniaun ne’ebé ita iha kona-ba an rasik.

Sá loos konsekuénsia sosiál ne’ebé aseitasaun profunda ida-ne’e bele iha? Komprende ita-nia limitasaun rasik no ita-nia pontu forsa rasik lori konsekuénsia kle’an hanesan tuir mai ne’e:

“Espoin an rasik” ba ema seluk ho modu konxiente;
La ta’uk ba ema seluk nia rejeisaun;
Iha hakmatek boot liután bainhira esprime emosaun no hanoin sira.

Ne’e hotu ita sintetiza iha kapasidade atu bele esprime an rasik livremente hodi la depende ba ema seluk nia aprovasaun tanba aseita tiha ona buat hotu an rasik nian.

Konsekuénsia daruak sai auténtiku parese kontradisaun ida; autentisidade mak dalan tun nian ba mudansa. Dalabarak ita sente hakaran ida atu sai diferente, atu muda buat ruma iha parte materiál, iha karákter no esperiénsia moris nian, maibé tanba motivu ruma ita la konsege. Identifika pontu partida nian mak elementu fundamentál: atu harii itineráriu eh dalan ida mudansa nian presiza iha pontu to’o nian, maibé mós hatene husi ne’ebé mak ita atu hahú.

Autentisidade tama iha dalan ida-ne’e nu’udar rekursu importante; atu muda, fundamentál liu:

1. aseita pontu nakukun sira, katak saida mak ita hakarak tebes duni troka,
2. estabelese mudansa realista sira,
3. verifika rekursu sira ne’ebé ita iha liman.

Indivíduu ida ne’ebé hakarak sai ema ho dispozisaun di’ak ba servisu no muda ninia kualidade relasionamentu nian ho maluk sira nia sei labele muda se nia hahú husi prekonseitu/presupostu/hanoin katak ema hotu ladi’ak ho nia tanba ida-ne’e hanoin ida ne’ebé la’ós rasionál, ne’ebé la tau iha roman mudansa ida ne’ebé nia bele halo (fó responsabilidade/salan ba ema seluk) no impede atu foka nia atensaun iha ninia rekursu sira rasik.

Sai auténtika/u mak aptidaun/dispozisaun ida ne’ebé halo ita manán? Ne’e mak dalan ida ne’ebé dura moris tomak, susar liu, maibé halo sai livre no konxiente liután kona-ba imajen pozitiva no/eh negativa an rasik nian  ne’ebé ita bele iha, iha hakmatek tanba hatene katak ita labele halo ema hotu kontente.