¿ “HA’U IHA MEHI IDA?” EH “HA’U IHA PROJETUIDA?”

Ita nesesita lideransa ida ne’ebé inspira ita no  halo ita hola parte ho laran-manas ba mehi ida no la’ós ba lideransa ida ne’ebé ezije de’it  submisaun husi ita ba planu ida pré-estabelesidu no nakfilak ita ba kolaboradór/a forsadu/a sira, ne’ebé halo tuir de’it ba orden ne’ebé fó eh buat hakerek iha kontratu. Ita presiza lider sira hodi tuir sira, la’ós tanba obrigasaun, maibé tanba hakaran, la’ós tanba “ita tenke” maibé tanba “ita hakarak”.

Maibé¿ sá loos segredu ba lideransa inspiradora, mobilizadora, revolusionária? Simon Sinek, peritu ida antropolojia nian, iha nia livru “Start with Why” (“Hahú husi tanba sá”) esplika iha 2009 ninia teoría kona-ba modu atu nakfilak an ba lider efetivu sira ne’ebé inspira mudansa: no nia hanaran “sírkulu osan-mean nian”. Ita imajina sírkulu konséntriku tolu: ida ne’ebé iha esternu liu mak sírkulu “¿saida?” eh “what?” nian; ida klaran mak síkulu “¿oinsá?” eh “how?” nian no iha laran liu mak sírkulu “¿tanba sá?” eh “why?” nian. Sírkulu tolu ne’e korresponde malu la’ós ho ita-nia psikolojia, maibé ho ita-nia biolojia (neocórtex, cerebro límbico). Iha ne’ebá mak estrutura ita-nia kakutak, Simon Sinek dehan. Lideransa inspiradora mosu iha sentru no projeta ba li’ur. Buat ne’ebé akontese baibain ho lideransa sira kontráriu: husi li’ur ba laran.

Iha ninia livru ita bele foti fraze sira hanesan tuirmai ne’e:

“Ó halo kontratu ho ema tanba de’it sira bele realiza serbisu ida karik, sira sei serbisu, maibé serbisu de’it ba osan. Maibé ó hakarak ema ne’ebé fiar iha buat ne’ebé ó fiar karik, sira sei kolabora ho ó maski ba sira kusta raan, kosar no mata-been”.

“Martin Luther King Jr. Halo diskursu ida kona-ba “¡Ha’u iha mehi ida!” (I have a dream), no la’ós kona-ba “Ha’u iha programa ida”.

Abordajen ida-ne’e, aparentemente simples no óviu, tulun ha’u atu halo reflesaun kona-ba nesesidade atu hakat husi lideransa konvensionál iha Kreda no iha vida relijioza, ba lideransa inspiradora no alternativa. Ita-nia difikuldade boot iha oras atu “moris hi’as” eh “hafoun an” nu’udar Kreda partikular no Institutu relijiozu sira konsiste iha falta ba lideransa inspiradora ida; ita iha “managers” ne’ebé haka’as an atu impoin no halo kumpre programa sira, mai ita falta hatán ba kestaun fundamentál ida: “¿tanba sá?”.

Lideransa “saida” (what) nian: rezultadu sira!

Eziste tipu ida lideransa nian ne’ebé totalmente orienta ba konsegimentu rezultadu sira-nian. Rezultadu ne’ebé liga ho kreximentu: boot iha númeru, boot iha ekonomia, boot iha prestíjiu no fama, boot iha prezensa sosiál… Lideransa rezultadu sira-nian mobiliza ema liuhusi eh hodi obrigasaun; nia uza xantajen (ameasa) podér nian (“se ó la haka’as an iha-ne’e, ó sei simu nia konsekuénsia sira!, nune’e keta husu favór”, “se ó la kolabora ho sistema, sistema la kolabora ho ó”). Ema ne’ebé hanoin kona-ba tipu lideransa ida-ne’e, bainhira husu konta, sira halo de’it iha xave rezultadu nian, no sira ne’ebé fó konta, sira mós halo ida-ne’e ho xave hanesan. Ita haree ida-ne’e iha ámbitu polítika nian, iha ita-nia parlamentu sira.

Tipu lideransa ida-ne’e nian prezente mós iha Kreda, iha vida relijioza, iha grupu sira ne’ebé “sai boot” iha númeru, iha atividade barbarak, ne’ebé iha ekonomia saudavel no próspera, ne’ebé funsiona nu’udar makinaria auténtika sira. Efeitu sira husi forma governu nian ida hanesan ne’e halo ita hakfodak, maibé lori deziluzaun mai ita. Sira nafatin husik vítima iha kuak laran. Ema ne’ebé book an la sai iha foto laran. Sira ne’ebé dósil mak instituisaun haree di’ak; haree nu’udar indispensavel. Ema ne’ebé admira tipu lideransa ne’e nian argumenta nafatin “rezultadu sira”: “¿ó haree joven hira iha JMJ (jornada mundiál juventude nian)? Eh ¿joven na’in hira mak atende imi-nia sentru formasaun nian? ¡No ho karreira sira!   Ézitu imediatu mak objetivu ba tipu lideransa ida-ne’e nian.

Ita bele dehan katak 100% instituisaun sira nian – no ema sira ne’ebé implika iha nia laran – tau iha sentru sira-nia atensaun nian “buat ne’ebé sira halo” no justifika sira nia an husi rezultadu sira. Ema ne’ebé iha konseitu lideransa ida-ne’e, seguramente sira prontu atu husu konta ba Papa Francisco: ¡Hatudu rezultadu no menus iha jestu sira!

Lideransa nu’udar “oinsá” (how): forma sira!

Iha modelu seluk lideransa nian, ne’ebé fiksa liu iha “oinsá. Ita haree frekuente modelu ida-ne’e. Lideransa ne’e uza planu [design] sira, ideia sira momentu nian, meiu komunikasaun foun sira. Lideransa ne’e la tau interese de’it ba rezultadu sira (“saida”, maibé – liuliu – fó importánsia ba modu, forma (“oinsá”).

Ita moris iha tempu ida iha-ne’ebé sensibilidade umana muda profundamente. La to’o atu ó informa de’it, presiza realiza sasán sira ho estilu ida ne’ebé afeta sentimentu sira, ne’ebé fó ksolok/apresia, ne’ebé hatán ba inovasaun nesesária sira. Iha-ne’e ita iha lideransa ida ne’ebé hakarak fa’an di’ak liuhusi kuidadu ba marketing. Ezemplu, atu halo kampaña kontra abortu, ne’ebé bele rezulta espetakulár, maibé ladún efikás. Nune’e ba buka “dezeñadór sira” (designers) ne’ebé iha kapasidade atu ko’alia ba sentimentu sira. Sei “kopia” buat ne’ebé parese interesante. Sei utiliza meiu sira komunikasaun nian (ipods, ipads, smartphones ho posiibilidade oioin), aprezenta planu governasaun nian ho diagrama furak oioin, halo aprezentasaun didi’ak kona-ba planu sira-ne’e. Ema asiste ba espetákulu ne’ebé oferese, maibé¿ sira sente buat ne’e dudu sira atu implika an eh envolve iha buat ruma diferente?

Ita bele dehan katak persentajen ruma instituisaun sira-nian no ema sira-nian foka sira-nia atensaun iha “oinsá sira halo”. Bainhira rezultadu sira la’ós satisfatóriu, sira bele rekoñese katak pelumenus “sira halo buat hotu ne’ebé sira bele”. Maibé instituisaun no sira-nia lider sira mantein iha nivel “oinsá”.

Papa Francisco mak espesialista ida iha “oinsá”: ninia jestu sira aprosimasaun nian, nia forma atu manifesta an, atu relasiona, hatudu mudansa iha “oinsá”. Pergunta ne’ebé ema ida halo mak: ¿Mudansa iha “oinsá” sufisiente atu la’ós de’it halo  rezultadu sai di’ak liután, maibé atu kria korrente ida transformasaun nian, mehi posivel sira iha ne’ebé ema hotu sente envolve an?

Iha vida relijioza ita iha ekipa foun governu nian ne’ebé revolusiona “oinsá” hodi jerasaun tuan sira ba admirasaun ne’ebé rekoñese katak sira la hatene aprezenta sasán sira nune’e. Mosu, seindúvida kestaun ida: ¿no buat sira-ne’e hotu, ba saida?

“Saida” no “oinsá” la to’o: la’ós mós dalan. Ita presiza to’o ba sira maibé husi diresaun kontráriu: husi “tanba sá” ba “oinsá?”, atu to’o ba “saida?”.

 Lideransa “tanba sá” nian (why): ¿Ba iha-ne’ebé (where) 1mak Espíritu lori ita?

Ema uitoan de’it mak husu tanba sá nia halo buat ne’ebé nia halo. Lider uitoan de’it mak halo ida-ne’e mós. Maski la iha konviksaun tomak, ema sira-ne’e la’o ba oin iha buat ne’ebé sira halo. Pergunta “¿oinsá?” rezulta inkómoda, perigoza, desliga an ho pasadu. Tanba ne’e mak instituisaun sira iha tendénsia atu evita pergunta radikál sira-ne’e.

Pergunta tanba sá nian mak, seindúvida, ita bele formula iha xave teolójika auténtika, nune’e: ¿Sá loos ita-nia misaun? ¿Sé mak determina ita-nia misaun? ¿Sá loos ita-nia razaun “ser”, moris nian (razon d’etre)? ¿Tanba sá mak importante ba mundu, ba sosiedade, ita-nia Kreda, ita-nia kongregasaun? ¿Ita simu bolun ba saida loos? Laiha institutu ida, eh komunidade ida mak iha vokasaun fotokópia nian. Pergunta ba identidade ida-ne’e vitál tebes.

Ne’e mak lideransa ne’ebé hatán ba vokasaun ida, ba krensa/fiar ida. Buat ne’ebé nia hakarak la’ós “manán mundu tomak”, maibé “salva klamar, vida, inspirasaun: realiza mehi ida. Fiar de’it mak bele fokit sai foho sira. Fiar husu atu “keta duvida” atu la mo’ut.

Dalaruma ita haree oinsá vida relijioza  re-organiza an; no prodús mudansa ne’ebé hatudu iha konfigurasaun jeográfika no pesoál; ida-ne’e implika lider sira atu deskobre “oinsá”: sira tau iha konta / konxiente kona-ba esperiénsia seluk, modelu seluk no identifika an ho sira ne’ebé konvinsente liu no bele aplika ba institutu rasik. Pergunta ne’ebé ema haluha – iha realidade –, eh mosu de’it iha surat-tahan, lahó reperkusaun boot, hodi la nakfilak ba kestaun rejeneradora, mak “¿tanba sá?”. Ita buka iha-ne’ebé mak lideransa ida lahó ¿tanba sá? Sériu ida bele lori bá?

Deskobre “tanba sá” iha ligasaun boot ho inspirasaun, la’ós de’it prosesu diskursivu simples ida. Inovasaun ne’ebé presiza iha momentu determinadu ruma ita simu nu’udar karizma, nu’udar don. Se mak husik atu inspirasaun auténtika ida book sira, atu mehi sira ne’ebé aparentemente imposivel, kauza ida, krensa ida, ideál ida lori sira,  faislmente sira hetan mehi-dór seluk mane no feto sira ne’ebé partila mehi ne’e, ne’ebé “hakarak” ninia realizasaun. Ba sira importante la’ós halo planu kedas, maibé husik atu mehi dudu sira ba buat ne’ebé imposivel.

Bainhira ó atua husi fiar/krensa/konviksaun sira, ó atrai ema sira ne’ebé fiar. No sira ne’ebé tuir ó la halo ba ó, maibé ba sira nia an rasik.

Lideransa “tanba sá” nian hatama iha instituisaun sira, iha organizasaun sira pergunta no resposta inovadora, kapasidade atu deskobre milagre sira no la fokaliza an iha problema sira.

Lider inspiradór/a sira, organizasaun sira ne’ebé hetan inspirasaun – independentemente husi sira-nia tamañu/baboot, ninia pozisaun – la fó primadu ba rezultadu sira, hafoin mak husu kona-ba “oinsá” no finalmente “tanba sá”, maibé hahú husi “tanba sá” atu tuirmai deskobre “oinsá” no finalmente rezultadu sira. Husi laran ba li’ur.

Buat ne’ebé tenke preokupa ita iha lideransa Kreda atuál nian, lideransa vida relijioza nian la’ós, nein rezultadu sira, nein oinsá, maibé deskobre “tanba sá” ita-nia instituisaun relijioza sira-nian, iha momentu atuál mundu nian. Iha Konsiliu Vaticano II Padre sira formula pregunta ida-ne’e: ¿Kreda, ó dehan saida kona-ba ó-nia an rasik? Ohin loron kestaun diferente no sai kompleksa liután: ¿Kreda, “ema seluk” dehan saida kona-ba ó? ¿Kreda, Espíritu lori ó ba iha-ne’ebé? ¿Saida mak Espíritu dehan ba ó iha momentu ida-ne’e?

Ha’u duvida maka’as katak resposta adekuada ba kestaun ida-ne’e ne’ebé fundamentál tebes, ema ida de’it mak bele fó, nune’e mós grupu aristokrátiku ida lider sira-nian mak bele fó. Ha’u fiar katak to’o ona tempu iha ne’ebé ita rona de’it Espíritu nia lian hodi halo esforsu revolusionáriu ida atu institui asembleia boot ida maun no biin-alin sira nian, ne’ebé reprezenta forma hotu ministériu nian no moris nian; dispostu la’ós atu impoin ideia rasik, priviléjiu no reklamasaun/direitu rasik, maibé atu rona buat ne’ebé Espíritu dehan ba Kreda ohin nian. No buat hanesan aplika, ba vida relijioza. La’ós kestaun atu salva kongregasaun eh institutu balun husi sira-nia mate ne’ebé akontese daudaun ona, maibé atu salva vida relijioza iha ninia konjuntu, hahú husi “mehi foun ne’ebé partilla ba malu”.

(JG)