Kapítulu Jerál online – Ezersísiu espirituál

Mornese – Loron dahuluk Ezersísiu espirituál nian, Mons. Thomas Menamparampil hato’o meditasaun ida ho títulu “Ha’u fiar iha Maromak, iha kontestu sosiedade sekularizada”. Liafuan lima nia husik ih aloron dahuluk atu hakle’an durante ninia konferénsia sira: fiar, profundidade, intensidade, radikál, responsabilidade.  “Ha’u hakarak husu imi durante retiru ne’e atu tama kle’an iha korridór nakukun sira imi nia mundu internu […] no loke área sira imi nia íntimu nian ba ‘Maromak nia Liafuan; ne’ebé moris no ativu, kro’at liufali surik”, Mons. Thomas hateten. Nia husu atu tama kle’an iha enkontru ho Maromak hodi deskobre an rasik, lialoos an rasik nian. “Ne’e mak signifikadu loos silénsiu nian iha kontestu Ezersísiu nian: horik iha Maromak nia prezensa”, Silénsiu ida la’ós regulamentu nian, dormitóriu nian eh rate nian, maibé “silénsiu ativu”.

Mons. Thomas subliña katak relijiozu/a sira presiza kuestiona an rasik bainhira “vokasaun sira hahú menus, tensaun interna sira aumenta, bainhira menus signifikadu no sensu hola parte nian sai fraku, bainhira motivasaun espiritual sira lakon forsa iha komunidade; bainhira ezemplu sira sakrifísiu nian menus efikásia apostólika diminui, no sosiedade sivíl akuza ita-nia salan sira lahó laran-sadia no lahó sensibilidade”.

Iha krítika no akuza sira ne’e nia oin, Mons. Thomas husu atu keta defende an maibé atu “dezenvolve sentidu responsabilidade nian atu oinsá evita fallansu sira ne’e ho haraik-an no tulun ema seluk mós atu halo hanesan”.  Ba sosiedade ne’ebé  denunsia ita-nia resposta ténkeser, “Obrigada ba ó-nia mensajen, ami sei foti ó-nia korresaun ho seriedade”, nia  afirma.

Mons. Thomas hateten katak, ohin loron susar atu tranzmite  Mensajen Fiar nian ba mundu ida sekularizadu lahó Fiar adekuadu iha ita. Sínodu Bispu sira-nian iha 2012 ko’alia kona-ba Fiar. Fiar sentrál tebes. Ema leigu dalaruma kuestiona se amlulik no relijiozu/a sira iha fiar eh lae. Se ita la iha fiar oinsá ita bele haklaken fiar?

Konvite ida ba kapitulár sira atu haree iha sira-nia an área sira ne’ebé karik seidauk evanjeliza, basá dalabarak karik “ita sai delek ba vantajen sira Evanjellu nian (hetan dala atus ida iha rai ne’e, paun no ikan, eh posibilidadade atu ukun tribu 12 Israel nain)  nune’e la tau atensaun ba dimensaun Evanjellu nian ho ninia ezijénsia sira atu haluha an rasik, haluha família, lori krús, mate ba an rasik”.

Hodi hakohak ita-nia krize sira, hodi Evanjellu evanjeliza  uluknanai an rasik mak ita bele evanjeliza. Halo nune’e mak ita bele “apropria agonia umana dúvida nian: difikuldade atu fiar, agonia fiar-laek nian, sofrimentu tan la moris fiar maski fiar, no ánsia iha dalan fiar nian no iha etapa ida-idak moris. Santu sira serbisu maka’as no ho konstánsia atu persevera no buras iha fiar.  S. Francisco de Sales luta no haka’as ba tinan 20 resin ba ninia fiar”.

Halo nune’e, sei tulun atu komprende di’ak liután mós dúvida sira ne’ebé foin-sa’e sira dalabarak iha: “Bainhira ita-nia joven ida nega eh sadik hanorin sarani sira, ita tenke komprende no konsidera buat ne’e nu’udar hakaran boot atu sai husi inserteza rasik no hetan dalan atu fila hikas ba Maromak”, Mons Thomas resalta.

Nu’udar dezafiu ba evanjelizasaun foun, arsebispu Thomas husu: «Nu’udar animadora espirituál, it abele oferese interpretasaun ida fiar nian ba eventu sira no prosesu sira momentu ne’e nian no tulun ema sira atu sai konxiente kona-ba Maromak nia liman ne’ebé hala’o obra iha momentu hotu, mai ita rasik no hafoin ba ema sira seluk? It ahatene la’o ho sira no konvida sira atu loke espasu ida ba Maromak enkuantu sira iha sira-nia inkietude interiór (laran la hakmatek) kontinua buka dalan ida saida nian?”.

Ho de’it silénsiu ativu iha diálogu intensu ho Maromak mak ita hetan kbiit atu tama kle’an iha Maromak nia lójika no mós atu besik ba maluk sira.

Iha buonanotte, Madre Jerál  iha sintonia ho “loron fiar” nian, fó hanoin fali kona-ba Madre Mazzarello nia fiar.  Nia salienta katak iha Madre Mazzarello nia konfiansa no fiar ba Maromak mak halo Institutu moris (bainhira nia koko ninia kbiit-laek tan moras). Madre Jerál fó hanoin fali  konsekuénsia sira fiar nian iha Madre Mazzarello, hanesan buka Maromak ho laran-manas, dezeju atu halo foin-sa’e sira koñese no hadomi Maromak, ksolok fiar nian iha Maromak nia prezensa, domin iha fiar no dixernimentu esesniál nian. «Maria Domenica moris ksolok fiar nian, Nia moris ho freskura iha orizonte luan no kle’an, la taka an iha imediatu no iha superfisiál. La iha monotonia, pesimizmu no baruk iha nia loron sira. Maromak iha fatin sentrál, nia mak uma nia na’in”.

Maria Domenica sente Maromak horik iha nian no iha Maromak nia sente firme no haksolok, “Iha Jezús mak ita-nia kbiit tomak. Enkontru ho Nia lori ita ba rai firme Ninia domin nian, Halo ita sente hela iha uma!”.