Tinan 20 liubá, ita la prevé katak iha selulár/mobile-phone sira nia laran iha ensiclopédia dijitál sira, mapa mundu nian, kámara fotografia no filme nian, rede sosiál sira, Facebook, Twitter, Whatsapp, calculator, livru, televizaun, filme, informasaun lahó limite, application/aplikativu barbarak no fasilidade seluk tán ne’ebé mai muda ita-nia moris. Ohin loron ita lori mundu iha ita-nia bolsu sira.

Evolusaun telefone selulár nia velosidade fó sasukat ba velosidade dezenvolvimentu teknolojia dijitál nian. Nia la transforma de’it selulár sira, maibé instánsia hotu vida kontmeporánea nian, ho ninia podér atu muda komportamentu, área sira koñesimentu nian no ita-nia vizaun mundu nian. Sinerjia teknolojia foun nian ho siénsia sira fasilita deskoberta barbarak no invensaun sientífika lais liu no ho kualidade boboot (jenoma umanu, vida sintétika, klonajen, saude…). Deskoberta no invensaun sira-ne’e bele publika kedas no ema iha fatin hotu bele hetan asesu imediatu. Buat sir ane’e hotu bela halo ita hakfodak tanba ema la prepradu atu enfrenta konksekuénsia sira husi ninia kriasaun rasik, la reflete kona-ba modu étiku atu asegura nia an husi mudansa paradigmátika barbarak sira nia rezultadu sira.

Intelijénsia komputadór sira-nian kontinua dezenvolve basá nia funsaun mak atu aprende, iha prosesu ida hanesan ho intelijénsia umana, no ida-ne’e bele lori konsekuénsia ba umanidade, se mákina sira intelijente liu ema.

Vida virtuál sai naturál, lahó limite ho vida reál,no komputadór sira sei lai husi screen muda mai ita-nia isin, bele hatais Internet, hanesan relójiu sira ne’ebé Apple lansa,  no Google Glass  nia ókulu sira, no ba objetu sira seluk tan, nune’e nakfilak buat hotu hale’u ita iha ‘suporte intelijente’ (intelligent devices).

Hamutuk ho avansu teknolójiku no sientífiku sira, rekursu sira planeta nia mohu ba daudaun, basá umanidade gasta liu fali buat ne’ebé Rai konsege fó. Kestaun ne’e koinside ho mudansa klimátika sira, ne’ebé sai maka’as ba beibeik iha tinan sira ikus ne’e. Diskusaun kona-ba klima muda, bele tanba ema nia hahalok eh bele mós tanba konsekuénsia siklu planetáriu ruma. Buat ne’ebé importa mak fenómenu to’o ona no ezije mudansa radikál iha komportamentu umanu iha relasaun ho rekursu sira hotu, no entre sira-ne’e, ai-han no bee. Bainhira kuran bee moris sei la sai faisl.

Iha senáriu avansu teknolójiku-sientífiku ho velosidade maka’as iha ámbitu hotu ida-ne’e mak jerasaun sira sékulu XXI nian moris bá. Sira moris iha realidade ho mediasaun teknolojia dijitál nian, ne’ebé permiti asesu boot ba informasaun, komunikasaun no divertimentu iha momentu hotu no iha fatin hotu.

Husi ki’ik kedas labarik sira ohin nian hatene ona interaje ho mákina, ho modu presizu no intimidade. Ba labarik sira moris iha era dijitál, sira iha kapasidade atu hasoru teknolojia tempu nian, ne’ebé kontinua muda no dezenvolve.

Marc Prenski, autór livru barak kona-ba moris iha mundu dijitál, hanaran jerasaun ne’e “nativu dijitál sira” (digital natives) no propoin katak sira-nia funsionamentu kognitivu diferente husi jerasaun molok. Prenski hanaran jerasaun molok, ne’ebé buka akompaña tuir teknolojia foun sira, “imigrante dijitál sira” (digital migrants), ne’ebé moris molok kultura foun, sei  hanoin kultura antiga, bainhira sira forma sira-nia vizaun mundu nian no sira-nia kostume no matenek sira.

“Imigrante sira” aprende pasu ida ba pasu seluk, husi simples ba kompleksu, ho foku ida mesak, enkuantu “nativu sira” iha asesu ba informasaun naran de’it, husi diresaun oioin iha tempu hanesan, lahó foku ida determinadu. Modu rua aprende nian ne’e signifika koneksaun serebrál/kakutak nian ne’ebé lahanesan. La iha di’ak liu ida fali, maibé diferente. Buat ne’ebé importante mak forma aprende nian muda no presiza akompaña no rekoñese jerasaun foun sira nia modu foun.

Sá de’it konsekuénsia teknolojia ohin nian iha futuru? La’ós de’it iha relasaun ho komportamentu sira, valór sira no matenek sira, maibé mós iha relasaun ho teknolojia dijitál rasik ne’ebé dezenvolve ba beibeik iha tempu badak. Iha mudansa ida ne’ebé la’o daudaun, envezde ba kontr, presiza partisipa iha nia no koko influi ninia diresaun.

Peskiza resente ida ho labarik sira husi tinan 6-11 hatudu rezultadu tendénsia foun sira. Labarik sira ho idade pré-adolexente hatudu karakterístika sira diferente husi nativu dijitál sira. Sira hanaran labarik sira ne’e Labarik F5. Tekla F5 mak tekla komputadór nian ne’ebé atualiza screen. Labarik sira-ne’e atualiza iha momentu hotu. No F5 mak: FULLTIME – konekta tempu tomak; FEED – asesu permanente ba konteúdu foun sira; FILTRU – konsege selesiona ho modu naturál buat ne’ebé interesante; FOKU – hakle’an buat ne’ebé sira gosta; FLEKSIBILIDADE – nafatin hahú prosesu, hodi pasiar ba asuntu no fonte oioin.

Howard Gardner, autór “Theory of Multiple Intelligences”, iha peskiza ida halo iha 2013, no nia rezultadu mak livru ida ho títulu “The App Generation”, indika katak sá “jerasaun aplikativu nian”, Applikativu sira/Application sira mak programa sira ne’ebé dezenvolve liuliu ba selulár sira, posibilita asesu lais ba múzika, jogu,  news, livru sira, disionáriu sira, hatán ba pergunta sira, kontrola dieta, toba, alarme, ajenda sira no funsaun lubuk ida tan. Foin-sa’e sira moris iha application sira nia laran, no fiar katak buat hotu ne’ebé nia presiza hetan solusaun husi app sira-ne’e ida. Se ba dezeju ida seidauk iha app ida – no se ladauk dezenvolve – ne’e tanba dezeju ida-ne’e la nesesáriu. Autór preokupa katak dependénsia ba app sira hapara kriatividade no kapasidade atu dezenvolve pensamentu autónomu. Ba Gardner, disponibilidade, podér no dezenvolvimentu app sira-nian marka jerasaun atuál nu’udar diferente no espesiál. Ninia konxiénsia forma liuhusi imersaun iha application sira.

Ita tenke tau iha neon katak mídia/suporte lahanesan muda ita-nia kakutak nia sinapse sira. Bainhira ema seidauk inventa hakerek/eskrita, oralidade mak suporte ba informasaun sira. Ema dekór no resita informasaun. No ita hatene oinsá diferente liu entre lee husi rona istória ida eh testu seluk. Ita funsiona la hanesan iha situasaun rua ne’e. Agora, suporte écran/screen mak sai mediasaun ba informasaun no istória sira. No ho tempu sei mosu konsekuénsia teknolojia dijitál iha ita-nia koneksaun sira kakutak nian.

Nicholas Carr, autór “The shallow: what the internet is doing to our brain?”, afirma katak ohin-loron ita sai menus iha foku/konsentrasaun, namkari, iha leitura sira, mezmu sira ne’ebé ita konsidera leitór/a di’ak. Ne’e kestaun ida profundidade esperiénsia nian. Nia deskreve esperiénsia leitura nian nu’udar luku iha bee laran, tama to’o kle’an. Internet permite leitura ba testu barak ho lais, maibé peskiza sira hatudu katak ema la lee artigu to’o remata, haksoit husi ida ba seluk. Ne’e mak kestaun ida ne’ebé mosu nu’uda prreokupasaun ba labarik no foin-sa’e sira ohin-loron nian.

Kevin Kelly konfirma kestaun problema sira atensaun nian iha Internet. Difisil atu iha foku ba tempu naruk ho informasaun barbarak ne’ebé mosu iha minutu ida-idak. Ne’e dezafiu ida no ita la hatene sei lori ba iha-ne’ebé. Ita la hatene se abanbairua sei iha fatin ba livru ho narrativa naruk sira, klásiku sira… Joven sira ohin nian la lee livru sira. Maibé la asiste mós televizaun. YouTube mak sentru sira-nia kultura nian no fasil ba asesu no dijestaun. Ba Kelly, YouTube iha potensiál atu dezenvolve modu foun atu hakle’an konseitu sira, diferente husi livru, TV no video. Teknolojia foun sei mosu atu espresa ideia kle’an sira. Tempu mak sei dehan se loos ka lae.

Joven ohin nian utiliza maka’as testu ba komunikasaun. Sira mak responsavel ba futuru leitura nian.

Livru sira surat-tahan nian mak íkone sivilizasaun nian no tan nia beleza sira reziste iha fatin ruma, maski ita hatene katak leitura iha futuru mak eletrónika. Maski nune’e, narrativa sira sei la lakon enkuantu ema sei kontinua konta istória sira, la importante uza suporte ida ne’ebé.

Paradigma foun hahú emerje, ho ideia no valór foun sira. Moris iha tempu tranzisaun nian ida-ne’e buat ida furak, maibé ezije kapasidade adaptasaun nian, perda nian, mudansa nian no kompreensaun nian ba buat foun. Jerasaun foin-sa’e sira presiza hetan formasaun atu hanoin ho modu inovadór atu iha kbiit problem-solving nian. Jerasaun tuan nia papél mak apoia foin-sa’e sira iha flutuasaun no instabilidade sira-nia tempu nian.

(Patrícia Konder Lins e Silva)