Maria mak Kreda nia Inan tanba, nu’udar Kristu nia Inan, nia mós sai sarani no Kreda nia bibi-atan sira nia Inan, ne’ebé ho Kristu forma Korpu Místiku ida mesak.

Memória Beata Virjen Maria Kreda nia Inan fó hanoin mai ita kona-ba oinsá Maria nia maternidade divina ne’ebé haluan, hodi Jezús nia hakaran rasik, ba maternidade ema hotu nian no ne’e duni ba Kreda rasik iha hahalok entrega nian husi Krús leten.

Papa Francisco iha 2018, fiksa memória ne’e iha loron segunda depoizde solenidade Pentekostes nian, loron ne’ebé Kreda moris. Títulu ne’e la’ós buat foun ida. S. João Paulo II, iha 1980, konvida atu venera Maria nu’udar Kreda nia Inan; no molok nia S. Paulo VI, iha loron 21 Novembru 1964, iha konkluzaun sesaun datoluk ‘Concílio Vaticano II’, deklara Virjen Maria nu’udar “Kreda nia Inan”. No iha 1975, Santa Sé propoin Missa votiva ida iha onra ba Maromak nia Inan, maibé la tama iha memória Kalendáriu litúrjiku nian. Aleinde data ikus sira-ne’e, ita labele haluha katak títulu Maria Kreda nia Inan prezente ona iha sensibilidade Santu Agostinho nian no S. Leão Magno nian; Bento XV nian no Leão XIII nian, to’o mai Papa Francisco, bainhira iha 11 Fevereiru 2018, iha aniversáriu ba dala 160 aparisaun dahuluk Na’i-Feto nian iha Lourdes, fó dispozisaun atu halo memória ne’e sai obrigatória.

Orasaun

«Tulun ami, oh Inan, ami-nia fiar.
Loke ami nia tilun ba Liafuan, atu rekoñese Maromak nia lian no nia bolun.
Hafanu iha ami hakaran atu tuir ninia ain-hakat sira, hodi sai husi ami-nia rain no simu promesa.
Tulun ami atu husik nia domin kona ami, nune’e ami bele kona nia ho fiar.
Tulun ami konfia tomak iha Nia, atu fiar iha nia domin, liuliu iha momentu sira tribulasaun no krús nian, bainhira ami nia fiar simu bolun atu sai tasak.
Kuda, iha ami-nia fiar, ksolok Na’i Moris-Hi’as nian.
Fó hanoin mai ami katak ema ne’ebé fiar la hela mesak.
Hanorin ami atu hateke ho Jezús nia matan, atu Nia sai roman iha ami dalan. No atu roman fiar nian ida-ne’e sai boot ba beibeik iha ami to’o loron ne’ebé la nahas, katak Kristu rasik, ita Oan, ami Na’i».

(Papa Francisco, Lumen fidei n. 60)