Papa Francisco nia lia-menon molok harohan Regina Coeli, iha Domingu Pentekostes – 5 Juñu 2022

 

Maun no biin-alin doben sira, loron di’ak, domingu di’ak!

No ohin festa kmanek mós, basá ohin selebra solenidade Pentekostes nian. Ita selebra efuzaun Espíritu Santu nian iha Apóstolu sira, akontese loron limanulu depoizde Páskua. Jezús dalabarak promete ba sira. Iha Liturjia ohin nian Evanjellu relata mai ita promesa sira-ne’e ida, bainhira Jezús dehan ba dixípulu sira: «Espíritu Santu ne’ebé Aman sei haruka hodi ha’u naran, Nia sei hanorin imi buat hotu no sei fó hanoin ba imi buat ne’ebé ha’u hateten ba imi» (Jo 14,26). Ida-ne’e mak buat ne’ebé Espíritu halo: hanorin no fó hanoin kona-ba buat ne’ebé Kristu hateten. Ita reflete kona-ba asaun rua ne’e, hanorin no fó hanoin, basá hodi nune’e mak Nia halo tama iha ita-nia fuan Jezús nia Evanjellu.

Uluknanai, Espíritu Santu hanorin, Ho modu ne’e nia aiuta ita supera obstákulu ida ne’ebé aprezenta an iha esperiénsia fiar nian: distánsa, Nia tulun ita supera obstákulu distánsia nian iha espriénsia fiar nian. Defaktu, bele mosu dúvida ne’ebé entre Evanjellu no moris loroloron nian iha distánsia boot: Jezús moris tinan rihun rua liubá, tempu seluk, situasaun seluk, nune’e Evanjellu parese supera tiha ona, parese la adekuadu atu ko’alia ba ita-nia loron-ohin nian ho ninia ezijénsia no ninia problema sira. Mai ita mós mai hahusuk ida-ne’e: saida mak Evanjellu bele dehan iha époka internet nian, iha époka globalizasaun nian? Oinsá nia liafuan bele tau nia marka?

Ita bele dehan katak Espíritu Santu mak espesialista iha halakon distánsia sira, Nia hatene hakonu distánsia sira; nia hanorin ita supera sira. Nia mak liga Jezús nia hanorin ho tempu hotu no ema hotu. Ho Nia Kristu nia liafuan sira la’ós lembransa ida, lae: Kristu nia liafuan ho kbiit Espíritu Santu nian sai moris, ohin! Espíritu halo nia moris imai ita; nia ko’alia mai ita liuhusi Sagrada Eskritura no orienta ita iha prezente. Espíritu Santu la ta’uk sékulu sira ni apasajen; maibé halo fiar-na’in sira sai matan-moris ba problema sira no akontesimentu sira-nia tempu nian. Espíritu Santu, defaktu, bainhira hanorin, atualiza: nia halo fiar sai foin-sa’e nafatin. Ita iha risku atu halo fiar buat ruma muzeu nian: ne’e mak risku! Nia fali tau iha sintonia ho tempu,  nafatin tuir loron, fiar iha loron: no ne’e ninia serbisu. Tanba Espíritu Santu la kesi an ba époka ka moda sira ne’ebé liu, maibé lori iha loron-ohin atualidade Jezús nian, moris-hi’as no moris.

No oinsá Espíritu Santu halo ida-ne’e? Nia halo hodi fó hanoin [ricordare]. Ne’e mak verbu daruak, ri-cordare. Katak sá ‘ricordare’? ‘Ricordare’ katak “lori ba fuan: Espíritu Santu lori Evanjellu iha ita-nia fuan. Akontese hanesan ba Apóstolu sira: sira rona Jezús dalabarak, maibé sira komprende uitoan de’it. Akontese hanesan mai ita. Maibé husi Pentekostes mai oin, ho Espíritu Santu, sira re-korda no komprende. Sira simu ninia lifuan sira nu’udar hato’o ba sira duni no hakat husi koñesimentu esteriór, koñesimentu memória nian, ba relasionamentu moris nian, relasionamentu ho konviksaun, haksolok nian ho Na’i. Espíritu mak halo ida-ne’e, halo atu hakat hosu ‘rona  ema ko’alia” ba koñesimentu pesoál, ne’eb”e tama iha fuan. Nune’e Espíritu muda ita-nia moris: halo atu Jezús nia hanoin sira sai ita-nia hanoin. No ida-ne’e Nia halo hodi ‘re-korda” mai ita ninia liafuan sira, hodi lori  ba fuan, ohin, Jezús nia liafuan sira.

Maun no biin-alin sisa, lahó Espíritu ne’ebé fó hanoin mai ita kona-ba Jezús, fiar sai memória-laek. Dalabarak fiar sai lembransa ida lahó memória: maibé memória tenke moris, no Espíritu mak halo memória sai moris. No ita – koko husu ba an rasik – ita mak sarani ne’ebé haluha? Karik natón de’it inkómodu ida, difikuldade ida, krize ida atu haluha Jezús nia domin no monu iha dúvida no iha ita-nia ta’uk? Susar! Ita matan moris atu keta sai sarani sira lahó memória. Nia ai-moruk mak invoka Espíritu Santu. Ita halo beibeik, liuliu iha momentu importante sira, molok desizaun difisil sira no iha situasauns ira ne’ebé la’ós fasil. Ita foti Evanjellu no invoka Espíritu. Ita bele dehan nune’e: “Mai, Santu Espíritu, fó hanoin Jezús mai ha’u, leno ha’u-nia fuan”. Ida-ne’e orasaun furak ida: “Mai, Santu Espíritu, fó hanoin Jezús mai ha’u, leno ha’u-nia fuan”. Ita dehan hamutuk? “Mai, Santu Espíritu, fó hanoin Jezús mai ha’u, leno ha’u-nia fuan”. Hafoin, ita loke Evanjellu no lee pasajen badak ida, neineik-neineik. No Espíritu sei ko’alia ba ita-na fuan.

Virjen Maria, nakonu ho Espíritu Santu, halakan iha ita hakaran atu harohan no simu Maromak nia Liafuan.