Sé mak Espíritu Santu?

Tuir Katesizmu Igreja Katólika nian, Espíritu Santu mak “Terseira Pesoa Santíssima Trindade nian”. Katak, Maromak ida de’it, maibé iha pesoa diferente: Aman, Oan no Espíritu Santu. Lia-loos ne’e Jezús mak revela iha ninia Evanjellu.

Espíritu Santu koopera ho Aman no Oan husi hahú istória to’o ninia konsumasaun, bainhira Espíritu sei revela an no haraik mai ita, bainhira simu Nia nu’udar pesoa. Na’i Jezús aprezenta mai ita nu’udar pesoa diferente, ho nia modu atuasaun rasik no ho kráter pesoál.

Espíritu Santu, Don Maromak nian

“Maromak mak Domin” (Jo 4,8-16) no Domin mak Don dahuluk, iha nia iha don sira seluk. Domin ne’e “Maromak hasuli iha ita-nia fuan liuhusi Espíritu Santu ne’ebé haraik ona mai ita” (Rm 5,5).

Efeitu dahuluk Don Domin nian mak kasu/halakon ita-nia salan sira. Komuñaun ho Espíritu Santu,  “Na’i Jezús Kristu nia grasa, Maromak nia domin, no komunikasaun Espíritu Santu nian imi-nian tomak” (2Cor 13,13;) mak buat ne’ebé, iha Igreja, haraik hikas mai ita batizadu sira, tuir Maromak nia ilas ne’ebé lakon ho salan.

Hodi Espíritu Santu, ita bele dehan katak “Jezús Kristu nak Na’i”, katak atu iha kontaktu ho Jezús Kristu, presiza Espíritu Santu atu dada ka atrai ita.

Liuhusi Batizmu ita simu grasa moris foun iha Aman Maromak liuhusi Oan no Espíritu Santu. Basá maklorik sira Espíritu Maromak nian sei lori ba Oan; maibé Oan aprezenta ba Aman, no Aman haraik inkorruptibilidade. Ne’e duni, lahó Espíritu, labele haree Maromak Oan, no lahó Oan, ema ida labele hakbesik Aman, basá Aman nia koñesimentu mak Oan, no koñesimentu Maromak Oan nian bele hetan de’it liuhusi Espíritu Santu.

Moris no Fiar/Fé. Espíritu Santu ho nia grasa mak ‘ida uluk” atu fanun ita ba fiar no halo ita hahú moris foun. Nia mak bá uluk ita no fanun iha ita fiar. Maski nune’e Nia mak ida “ikus” iha revelasaun pesoa sira Santíssima Trindade nian.

Espíritu Santu koopera ho Aman no Oan husi hahú Planu Salvasaun ema nian to’o ninia konsumasaun. Iha “tempu ikus” de’it, ne’ebé hahú ho Oan nia Enkarnasaun redentora, mak Espíritu hatudu an no haraik mai ita, no rekoñesidu nu’udar Pesia.

Paráklitu. Lia-fuan gregu “parakletos”, mediadór, defensór, konsoladór. Jezús aprezenta Espíritu Santu mai ita hodi dehan: “Aman sei haraik ba imi Paráklitu seluk” (Jo 14,16). Advogadu defensór mak ida ne’ebé, hela iha ema kulpadu ka maksalak sira nia parte atu defende sira husi kastigu ne’ebé sira merese, salva sira husi perigu atu lakon moris no salvasaun rohan-laek. Ida-nee’ mak Kristu halo, no Espíritu Santu hetan naran nu’udar “paráklitu seluk” tanba nia kontinua halo sai operante redensaun ka makso’in ne’ebé Kristu hodi liberta ita husi mate ba nafatin.

Espíritu Lia-Loos nian: Jezús afirma kona-ba an rasik: “Ha’u mak dalan, lia-loos no moris” (Jo 14,6). No hodi promete Espíritu Santu iha “diskursu despedida nian” ho ninia apóstolu sira iha Han-Kalan Ikus, Nia dehan katak depoizde Nia bá, Nia sei mantein nafatin nia dixípulu sira iha lia-loos ne’ebé Nia haklaken no revela.

Paráklitu, mak lia-loos, hanesan mós ho Kristu. Kampu asaun Espíritu Santu nia atuasaun mak espíritu umanu no istória mundu nian. Momentu dahuluk atuasaun nian mak halo distinsaun entre erru no lia-loos.

Hela no atua iha lia-loos mak problema esensiál ba Apóstolu sira no ba Kristu nia dixípulu sira, husi tinan dahuluk sira Igreja nian to’o tempu nia rohan, no Espíritu Santu mak halo sai posivel atu lia-loos kona-ba Maromak, ema no nia destinu, too mai ita-nia loron sira lahó altersaun sira.

Símbolu sira

Iha Bíblia ita hetan forma diferente aprezentasaun Espíritu Santu nian:

• Bee: Simbolizmu bee nian signifikativu kona-ba Espíritu Santu nia asaun iha Batizmu, basá iha ne’e bee nakfilak ba sinál sakramentál moris foun nian.
• Unsaun/kose mina: Simboliza forsa. Kose mina mak sinónimu ho Espíritu Snatu. Iha sakramentu Konfirmasaun/Krizma, krizmandu simu unsaun atu prepara nia sai sasin Kristu nian.
• Ahi: Simboliza enerjia transformadora husi Espíritu nia obra ka hahalok sira.
• Kalohan no Roman: Símbolu rua haketak-laek iha manifestasaun Espíritu Santu nian. Nune’e mak nia tun ba Virjen Maria atu “taka nia ho ninia lalatak” . Iha foho Tabór, iha Transfigurasaun, iha loron Axensaun nian; mosu lalatak no kalohan.
• Selu/karimbu: mak símbolu hanesna ho unsaun. Hatudu karákter ne’ebé labele halakon unsaun Espíritu  nian iha sakramentu sira no ko’alia kona-ba ema kristaun nia konsagrasaun.
• Liman: Liuhusi impozisaun liman nian, Apóstolu sira no ohin-loron Bispu sira, tranzmite “Don Espíritu nian”.
• Manu-falur/pombu: Iha Jezús nia Batizmu, Espíritu Santu mosu ho forma manu-falur nian no tuur iha Nia.

Espíritu Santu no moris sarani

Ho Batizmu, Maromak nia Espíritu horik iha ema sarani nu’udar ninia templu eh uma-kreda. Ho kbiit Espíritu nian ne’ebé horik iha ita, Aman no Oan mós mai horik iha ita ida-idak.

Don Espíritu Santu nian mak:

• Hasae ita no asimila ita ba Maromak iha ita nia an no ita-nia asaun sira;
• Permite atu ita koñese no hadomi Nia;
• Halo atu ita loke an ba Pesoa Divina sira no halo sira horik iha ita.

Vida sarani nian mak ezisténsia espirituál ida, moris ida ne’ebé Espíritu Santu mak anima no gia ba santidade ka perfeisaun karidade nian. Hodi Espíritu Santu nia kbiit no ninia mata-dalan ita iha forsa ne’ebé presiza atu luta kontra buat hotu ne’ebé la tuir Maromak nia hakaran.

Don no frutu sira

Atu ema sarani bele luta, Espíritu Santu haraik prezente sira ho ninia don hitu, ne’ebé sai dispozisaun permanente hodi halo ema dosil atu tuir Espíritu nia impulsu sira. Don sira-ne’e mak:

1. Don Siénsia nian: ne’e mak don Espíritu Santu  nian ne’ebé permite atu ita iha asesu ba koñesimentu, Nia mak roman ne’ebé ema sarani invoka atu sustenta fiar batizmu nian.
2. Don Konsellu nian: hatene deside ho loos, fó konsellu ba ema seluk fasilmente no iha momentu nesesáriu, tuir Maromak nia vontade.
3. Don Fortaleza nian: mak Don Espíritu Santu  haraik ba fiar-na’in, tulun iha perseveransa, ne’e mak forsa sobrenaturál ida.
4. Don Intelijénsia nian: ne’e mak Don Espíritu Santu  ne’ebé lori ita iha dalan kontemplasaun nian, dalan atu hakbesik ba Maromak.
5. Don Piedade nian: ema sarani nia fuan labele sai malirin no indiferente. Fiar ne’ebé manas no kumpri hahalok di’ak mak Don Piedade nian, ne’ebé Espíritu Santu  hasuli iha klamar sira.
6. Don Sabedouria nian: Espíritu Santu haraik Don ne’e atu ita bele apresia buat ne’ebé ita haree, buat ne’ebé ita pre-sente husi Maromak nia obra sira.
7. Don Hamta’uk Maromak nian: ne’e mak Don ne’ebé salva ita husi orgullu ka foti-an, hodi hatene katak buat hotu ita deve ba Maromak nia mizerikórdia.

Frutu ka rezultadu sira Espíritu Santu nian mak: karidade, ksolok, Dame, Pasiénsia, Longanimidade, Bondade, Benignidade, Mansidaun/Laran-maus, Modéstia, Kontinénsia, Kastidade.

Kreda, komuñaun moris nian iha fiar ne’ebé Apóstolu sira transmite, mak fatin ba ita-nia koñesimentu kona-ba Espíritu Santu: iha Eskritura sira ne’ebé Nia inspira; iha Tradisaun, ne’ebé Padre sira Igreja nian sai sasin ne’ebé nafatin atuál; iha Majistériu Kreda nian, ne’ebé Nia asiste; iha liturjia sakramentál, liuhusi liafuan no símbolu sira, iha-ne’ebé Espíritu Santu tau ita iha komuñaun ho Kristu; iha orasaun ne’ebé Nia intersede mai ita; iha karizma sira no ministériu sira hodi harii Igreja; iha sinál sira vida apostólika no misionária nian; iha santu sira nia sasin, iha-ne’ebé Nia manifesta ninia santidade no kontinua obra salvasaun nian.

(JG)