Dili – Hamutuk ho Madre Julia, FMA, ami halo formasaun ba dala rua iha fulan Maio nia laran. Uluk knanain, iha dia 7 maio 2022, kona ba Plataforma asaun Laudato Sí ho objetivu hitu. Tempo hanesan Madre konvida ami foinsa’e sira hodi haklean Ensiklika Laudato Sì. Daruak, iha dia 28 de Maio 2022 kona ba Christus Vivit Capítulo 5-6, kona ba Foinsa’e nia dalan no abut. Nafatin ba joven ne’ebè frequente hela curso iha COJUCAD no ba membro estrutura COJUCAD. Foinsa’e sira ne’e hetan formasaun kada semana ho tema no formador/a sira ne’ebé diferente.

Ba dala uluk, Madre tulun ami foinsa’e sira atu forma konsiencia kona ba realidade ita nia mundo no realidade Timor ne’ebé moras dadaun, lalika ba dook iha deit Dili laran kuando udan bee nalihun lalais, mota sobu buat barak, sobu uma sira ne’ebé harii iha mota ninin sira, ema kontinua tesi ai hodi la hanoin atu kuda ai oan no fatin fatin ita hare bee foer nalihun hela, ema kontinua soe lixu iha fatin laloos, falta respeita ba ema seluk nia vida. Ba hahalok sira ne’e mak Amo Papa bolu atensaun ba ema hotu hodi tau matan ba uma komun. Nu’udar Kreda Timor la’o hamutuk ho Kreda Universal iha ne’ebé Diocese Dili hili tema pastoral 2022 kona ba Eucaristia no Ecologia.

Ohin, ami hetan oportunidade hodi haklean fila fali Ensíklika Laudato Sí no kuiñese Plataforma asaun konkretu objetivu hitu Laudato Sí nian. Iha ne’ebé sadik tebes ami atu foti impeñu tuir maneira foinsa’e nian hodi buka; hatan ba mundu nia hakilar, kiak sira nia hakilar, ekonomia ekolojia, estilu moris simples, edukasaun ekolojia, espiritualidade ekolojia no partesipa husi komunidade ba asaun konkretu Laudato Sí. Formasaun ida ne’e sadik tebes oinsá tau ba pratika asaun konkretu hodi kuida ambiente no kuida ser umano. Formasaun iha loron ne’e remata ho kondivisaun esperiensia no halo propósito hodi implementa Laudato Sí iha moris rasik.

Ba daruak, iha 28 maio 2022, kona Se mak foinsa’e nia dalan no nia abut? husi Christus Vivit capítulo V no VI. Formasaun ne’e ho objetivu atu tulun ami foinsa’e sira atu hametin amizade ho Kristu ida ne’e bele tulun ami atu manan ansiedade hodi haboot moris iha domin, laran luak, hatene fo perdua no hatene halo diálogo ho adultu sira.

Madre apresenta Amo Papa nia karta domin nian ne’ebé halo ami tama klean iha laran no sente hetan an iha karta refere tamba tulun tebes ami hodi rekuiñese an katak ami mak Maromak nia presente ohin hodi konvida ami atu aproveita didiak tempu juventude harii autonomia (ukun rasik an) maibé la’os mesa-mesak, foinsa’e ida ne’ebé buka nia rasik nia dalan, ne’ebé hakarak semo ho nia ain rua, ne’ebé enfrenta mundu no hateke ba orizonte ho matan nakonu ho futuru, nakonu ho esperansa, ami hamriik ho ain rua hanesan ema adultu sira, maibé la hanesan ema adultu sira, tamba ami halai ba oin nafatin. Tan ne’e, la bele hakotu ami nia ligasaun ho ami nia abut katak ho adulto sira ne’e, aprende husi sira, rona sira, la’o hamutuk ho sira basá sira mak armajen esperiensia significativa oin-oin ne’ebé hatene ona saida mak moris ne’e ninia furak no ninia moruk. La’o hamutuk ho sira ba hasoru futuru ho esperansa.

Karta ne’e mos fo atensaun ba ami foinsa’e sira atu la husik mundu lori ami ba buat ne’ebé la los no superfisiál. La husik atu Ema lohi no manipula ami ba sira-nia interese, se ema ruma dehan ba ami atu haluha ami-nia istória, la husik sira esplora ami nia juventude atu haburas moris ne’ebé la klean ne’ebé halo konfusaun iha buat ne’ebé furak no buat ne’ebé mosu de’it iha liur. Maibe, fo aten brani ba ami atu sai foinsa’e ne’ebé brani halo desisaun sira iha moris, la’os ida ne’ebé hela nafatin hanesan labarik ka hanaruk ami-nia adolesénsia hodi lakohi halo desizaun sira, hodi la preukupa depois se bainhira buat hotu la’o la diak, monu ka la iha esperansa. Iha momentu sira ne’e mak Jesus hamriik hela iha ami foinsa’e nia sorin. Jesus mak DALAN, keta kontente deit hela iha varanda ka tur iha “sofa”, maibe hatene foti risku la ho tauk atu halo sala. Moris buat hotu ne’e ho esperensia amizade no fraternidade. Husu atu ami Foinsa’e hametin ami nia fiar no amizade los ho Kristu nudar ami nia belun hodi simu Nia iha ami nia ‘ro’ no la’o ho Nia, iha esperansa. Se ami bele manan tentasaun ansiedade katak ami presisa haburas esperansa, pasiensia, kompromisu, no keta hakotu ami nia relasaun ho adulto significativa sira basa aprende husi pasadu atu aprende husi istória no kura kanek sira ne’ebé dala ruma sei moras. Hateke ba futuru atu haburas foinsa’e-nia entuziazmu, halo mehi sira mosu, fanu profesia sira no halo esperansa bele fo funan.

Formasaun remata ho diskusaun grupo no apresentasaun ho dinamika no kreativu ne’ebè adapta ba foinsa’e nia ritmu nia linguajen.

Ikus liu, konvida atu hametin nafatin amizade ho Kristu no moris la’os kaer ahi oan iha liman maibe sai roman ho moris rasik katak sai masin no roman ba malu.

Obrigada barak Madre tamba ita tulun ona ami atu konsiente kona ba ami nia an nudar foinsa’e hodi hamutuk ita lori ami ba komprende Amo Papa nia hanorin sira kona ba karta domin nian mai ami foinsa’e sira no asaun konkretu ba konversaun ekolojia.

Obrigada wain.

Vicente C, COJUCAD