Fuiloro – Vizita hahú iha 30 Maiu 2022. Ho laran haksolok tebes nu’udar komunidade, ami hato’o ami nia Boas-Vindas ba Madre Inspetora Me. Alma doben. “Ita nia prezensa sai nudar prezente ida dixípulu ami hotu. Hanesan Maria nia prezensa iha Kaná Galileia ne’ebé fó korajen ba Jezús nia dixípulu no sira ne’ebé serví meza, atu tau laran metin iha nia oan Jezús. Inan ne’ebé prezente iha festa ne’e mak tulun nain ne’ebe akompanha ita iha ita-nia moris loron-loron nian no fo korajen mai ita, atu la para bainhira hasoru difikuldade sira. Ne’e mak inan ne’ebé nafatin prezente, ne’ebé hakarak ita hotu sai tulun nain iha foinsa’e sira le’et”.

Vizita remata iha loron 4 Juñu, no “ami sente Inspetora nia vizita ida ne’e hakbiit no fó korajen mai ami ida-idak atu hakonu hikas fali tua ksolok, fidelidade no entuziasmu iha ita nia misaun iha foin-sa’e sira le’et.

Tan ne’e ami fó obrigada barak Me. Alma doben. Ba ita-nia domin,ksolok ne’ebé ita fahe ba malu durante loron hirak ne’e nia laran. Ami mós agradese ita tanba, bele fó tempu hodi rona ami ida-idak.

Liu-liu ita nia liafuan sira ne’ebé tulun ami atu bele fó atensaun ba buat ne’ebé ki’ik ka jestu ki’ik sira ne’ebé ami halo iha moris loro-loron nian. Dala ida tan obrigada barak”.

(Komunidade B. Maddalena Morano)