Juñu fulan “Sagrado Coração de Jesus” nian
Devosaun ba “Sagrado Coração de Jesus” iha orijen iha Bíblia, no Jezús rasik reforsa ho aparisaun ba Santa Margarida Maria Alacoque.
Tradisionalmente fulan Juñu mak fulan “Sagrado Coração de Jesus” nian. Ninia objetivu mak dudu sarani sira atu adora ho modu konxiente no intensu liután Jezús Kristu nia domin, reprezenta ho modu fíziku ho nia Fuan, ne’ebé fó hanoin ba Maromak halo An ba ema no horik iha ita leet.
Objetu devosaun furak ne’e mak Liafuan Halo An ba Ema nia Fuan, ninia aspetu fíziku nune’e mós ninia Domin, Jezús nia An rasik, ita-nia Makso’in.
Bainhira Jezús mosu ba Santa Margarida Maria Alacoque, iha 1673, Nia hatudu Ninia Fuan Divinu iha tronu ahi-lakan nian, ho koroa ai-tarak nian no ho krús harii iha leten. Tuir Santa Margarida, devosaun nee nia finalidade prinsipál mak konverte klamar sira ba Jezús nia Domin.
Iha aparisaun ne’e, Santa Margarida rona Na’i nia liafuan sira ne’ebé dehan:
“Ida-ne’e mak Fuan ne’ebé hadomi maka’as ema sira hodi la sukat sakrifísiu aas liu lahó limite no lahó rezerva, atu hatudu ninia domin. Maibé parte boot husi ema sira selu ho ingratidaun, ne’ebé manifesta ho falta respeitu, sakriléjiu no ho apatia no desprezu hasoru ha’u iha sakramentu domin ne’e”.
Maibé devosaun ba “Sagrado Coração” mai uluk ba aparisaun sira. Ninia orijen iha Sagrada Eskritura, basá fuan mak modu ida atu ko’alia kona-ba Maromak nia domin rohan-laek, no dmin ne’e nia tutun mak Jezús ninia hiit an mai mundu atu saran an tomak mai ita.
Eventu “forte” rua iha Evanjellu mak fonte inspirasaun nian:
- S. João Evanjelista, eskolante ne’ebé Jezús hadomi nia jestu, ne’ebé sadere ba Jezús nia fuan iha Han-Kalan Ikus (kf Jo 13, 23);
- Iha Kalváriu, momentu ne’ebé soldadu sona borus Jezús nia sorin ho diman (kf Jo 19, 34).
Iha epizódiu dahuluk, ita haree konsolasaun ne’ebé Jezús oferese mai ita, iha epizódiu daruak, ita haree sofrimentu ne’ebé ita provoka ba Nia ho ita-nia salan sira, ne’ebé Nia hakarak kasu.
Tanba ne’e iha fulan Juñu ita simu konvite atu hatudu ba Jezús, la’ós de’it ho liafuan, maibé liuhusi hahalok sira katak ita hadomi Nia no korresponde ka hatán ba Ninia domin rohan-laek.
Kona-ba devosaun ba “Sagrado Coração”, ne’e mak kontemplasaun ba Jezús nia sorin ne’ebé diman sona borus, no hatudu Maromak nia vontade atu salva ema. Nune’e ita-nia kultu ka devosaun mak adorasaun ba Maromak nia domin, ne’ebé simboliza iha “fuan ne’ebé sona borus”.
DON BOSCO NO DEVOSAUN BA JEZÚS NIA FUTAR FUAN SANTU
Don Bosco iha devosaun boot ba Sagrado Coração: “Husi ne’e ita manán laran-manas loos, ha’u hakarak dehan Maromak nia domin, maibé atu lori ba ema seluk no halo klamar sira partisipa iha nia”. Devosaun ne’e nia esplisita ho insisténsia iha konfisaun no komuñaun frekuente no iha partisipasaun ba Missa loroloron, koluna sira ne’ebé tenke tahan edifísiu edukativu no anima iha prátika Sistema Preventivu nian.
Iha ninia moris nia rohan, nia aseita Papa Leão XIII ninia pedidu atu kompleta Bazílika Sacro Cuore iha Roma. Kreda ne’ebé Papa Pio IX hahú iha 1870, bele kontinua fali no remata iha tinan ruma de’it (1880-1887) tanba Don Bosco ninia enerjia. Empreza ida ne’ebé kusta la’ós sakrifísiu uitoan de’it.
Susesór dahuluk Don Bosco nian, beatu Michele Rua, konsagra Kongregasaun Saleziana ba Sagrado Coração iha Dezembru 1899 no, iha okaziaun ida-ne’e, nia fó orden atu ima hotu iha devosaun ne’e, liuliu ba uma formasaun sira, no nia husu atu dedika novisiadu sira ba Sagrado Coração. Molok nia mate Don Rua husu ba Don Francesco Cerruti atu hakerek orasaun ida ba Sagrado Coração ba vokasaun sira. Ba nia, Don Cerruti aprezenta orasaun tuirmai ne’ebé nia aprova, nia reza no husu atu tau kópia ida iha ninia sumasu okos: “O Cuore Sacratissimo di Gesù, affinché tu mandi buoni e degni operai alla Pia Società Salesiana e li mantenga fedeli in essa, Ti preghiamo, ascoltaci!” [Oh Jezús nia Fuan Sakratíssimu, atu Ita haruka servisu-na’in di’ak no dignu ba Pia Sosiedade Salesiana no halo sira fiél iha laran, Ami harohan, rona ami!]
