Nomeasaun arsebispu metropolita Dili ba Kardeál, primeiru kardeál Timor nian, iha loron 29 Maiu 2022 depoizde Regina Coeli husi Papa Francisco, no sei simu ofisialmente knaar iha 27 Agustu 2022, sai okaziaun di’ak atu esplora mundu purpuradu ka hatais mean nian, ne’ebé ema ladún koñese maibé sempre ko’alia kona-ba sira.

 

Sé mak kardeál sira?

Kardeál Kreda Katólika Romana iha lia-latin hanaran “Sanctae Romanae Ecclesiae Cardinalis”, mak preladu ida, ne’ebé Amu-Papa hili no nia iha jerarkia katólika hela iha Amu-Papa nia okos; tuir direitu kanóniku kardeál mak kolaboradór diretu Amu-Papa nian no kolaborasaun ne’e nia hala’o hodi ezerse knaar importante sira iha ‘Curia romana’ (prezidénsia ba organizmu ka dikastériu sira) ka nu’udar bispu iha dioseze ruma iha mundu, ne’ebé hetan konsiderasaun nu’udar kardeál (eixu, hadulas haleu Papa) tanba prestíjiu ka tradisaun ekleziál.

Bainhira Amu-Papa ida mate ka rezigna an, kardeál sira mak iha kompeténsia atu hili bispu foun Roma nian iha asembleia ida hanaran “Conclave”.

Ema balun hanoin katak sai kardeál simu tan “orden”, hodi hanoin katak impozisaun barrete nian mak ritu ida kona-ba ‘nivel dahaat’ orden sagradu nian. Ne’e la loos. Tuir Katesizmu Kreda Katólika n.1536, sakramentu ministériu apostóliku iha grau tolu: episkopadu, presbitériu, diakonadu.

La’ós ministériu ordenadu ida

Dignidade kardeál nian la’ós ministériu ordenadu ida no la tama iha jerarkia ‘direitu divinu’ nian (ne’ebé tuir Kreda Jezús Kristu rasik mak institui).

Maibé husi 1962, liuhusi motu proprio Cum Gravissima  Papa João XXIII, kardeál hotu tuir regra tenke hetan ordenasaun ba bispu.

Maibé iha realidade,  João Paulo II,  nune’e mós Bento XVI , no Amu-Papa Francisco foti ba kardeál amlulik ruma ne’ebé tinan 80 ba leten (nune’e lahó direitu votu iha ‘conclave’) ne’ebé husu no hetan husi susesór Pedro nian posibilidade atu renunsia ba dignidade episkopál.

Kardeál sira hala’o sira-nia kolejialidade no iha sira-nia konjuntu forma koléjiu kardeál sira-nian ka hanaran mós purpuradu  (tan kór mean hatais nian); sira nia reuniaun ne’ebé Papa mak prezide hanaran ‘consistório”.

Kódigu Direitu kanóniku iha kanon 351 estabelese katak sira bele promove ba kardeál sira ne’ebé konsagradu ona nu’udar presbíteru ka bispu. Iha grau/orden tolu iha koléjiu kardeál sira-nian: orden episkopál ka kardeál-bispu, orden presbiterál ka kardeál-presbíteru no orden diakonál ka kardeál-diákonu.

 Númeru

Atu kria kardeál foun tuir Direitu Kanóniku tenke akontese iha prezensa koléjiu kardeál sira-nian, hanaran, ‘Consistório’.

Baibain nomeasaun ba kardeál foun sira fó sai antes, maibé ho publikasaun formál dekretu papál nian de’it durante ‘concistório’ mak elevasaun ba grau kardeál nian hetan efeitu.

Ida-ne’e vale mós ba kardeál sira ne’ebé Amu-Papa la fó sai naran ba rejiaun partikulár ruma (baibain, ho karákter polítiku), hanaran kardeál ‘in pectore’.

Númeru kardeál sira-nia lahanesan, husi 20 ba 40 iha sékulu dahuluk sira miléniu daruak nian, hafoin Sixto V fiksa ba 70 iha 1588, hodi hanoin katuan na’in 70 Israel nian ne’ebé Moisés hili durante ézodu.

Iha 1958 Papa João XXIII haboot númeru, enkuantu Paulo VI ho motu proprio Ingravescentem Aetatem dekreta katak bainhira to’o ona tinan 80 moris nian kardeál sira lakon direitu atu tama iha ‘conclave’ (atu hili Papa), maibé la lakon direitu atu sai eleitu. Nia fiksa númeru másimu eleit’or nian mak 120.

Papa João Paulo II mak kria númeru boot liu kardeál sira iha istória: 231 (mai husi nasaun 69) iha ‘consistório’ 9 nia laran.

Ho anúnsiu husi Papa Francisco iha 29 Maiu 2022 kona-ba kardeál foun sira, ita haree koléjiu kardeál sira-nian ne’ebé internasionál ba beibeik, ho númeru boot ba Ásia. Amu-Papa fó sai katak iha 27 Agostu mai – sábadu, memória litúrjika Santa Mónica nian, S.Agostinho nia inan – sei iha ‘consistório’ ida ba kriasaun kardeál foun na’in 21, iha-ne’ebé na’in 16 mak eleitór no na’in lima liu ona tinan 80. Anúnsiu ne’e, hanesan baibain mak surpreza ida, ba sira-ne’ebé interesadu no mós ba media (inklui media vaticano nian).

Remata Agostu, sic rebus stantibus, purpuradu sira sei sai 229, no votante sira na’in 132 (la inklui kardeál Angelo Becciu). Númeru aas liu númeru 120 ne’ebé fiksa tiha ona, no sempre halo tuir, husi Paulo VI. Maibé Papa João Paulo II no Papa Bento XVI sira sempre liu númeru ne’e, Presiza tau iha neon katak, iha fulan ru ania laran eleitór na’in haat sei halo tinan 80, nune’e eleitór sira sei tun ba 128. Iha Setembru 2023, ho motivu hanesan, eleitór sira sei tun ba sifra kanónika 120 nian.

Depoizde ‘consistório’ iha Agostu nia rohan eleitór sira ne’ebé Papa Francisco foti sei sai 83 husi na’in 132 (sei tun ba na’in 82 tinan remata), na’in 38 Papa Bento XVI mak foti (maibé sei tun ba na’in 34 iha tinan nia rohan no ba na’in 29 iha Setembru 2023), na’in 11 Papa João Paulo II mak foti (sai na’in 10 iha tinan nia rohan no ba  na’in 9 iha Setembru ’23).

Husi eleitór foun na’in 16 na’in 6 ordináriu iha rai sira Ázia nian (rua husi Índia; ida misionáriu ‘consolata nian’, bispu piemonteze Giorgio Marengo, ne’ebé ho tinan 48 nia mak kardeál otas ki’ik); husi Singapura, Arsebispu William Goh Seng Chyenaran; D. Lázaro You Heung-sik husi Korea   – Prefeitu ‘Congregação para o Clero’; no husi Timor-Leste, Arsebispu metropolita Dili nian, Salezianu D. Virgílio do Carmo da Silva. Husi Europa na’in haat, husi Amérika Latina na’in tolu (brazileiru na’in rua), husi USA ida, husi Áfrika na’in 2.

Ho ‘consistório’ Agostu 2022 nian, ba dala uluk iha kardeál ida ba Paraguay (Adalberto Martinez Flores, arsebispu Asuncion, tinan 71), Singapura (William Seng Chye Goh, tinan 65),  Mongolia (katóliku 1.359 ho Giorgio Marengo tinan 48) Timor-Leste (salezianu D.Virgilio do Carmo da Silva, arsebispu Dili nian, tinan 55).

Iha 27 Agostu Papa Francisco sei fó mós púrpura ba kardeál na’in 5 ne’ebé tinan 80 ba leten: D. Jorge Enrique Jimenez Carvajal (kolombianu arsebispu eméritu Cartagena nia); salezianu D. Luc Van Looy (bispu eméritu Gent nian, tinan 81); D. Arrigo Miglio (arsebispu eméritu Cagliari nian husi Piemonte, tinan 80 iha Jullu); jezuita romanu D. Gianfranco Ghirlanda (kanonista, tinan 80 iha Jullu; kanóniku S. Pedro nian Mons Fortunato Frezza (tinan 80).

Ikusmai, Konsagradu sira iha Koléjiu kardeál sira-nian iha Agostu nia rohan nia númeru sei sa’e. Ho ‘consistório” ne’ebé mai númeru relijiozu sa’e ba na’in 53, na’in 26 mak eleitór. Salezianu sira sa’e ba na’in 11 (na’in 5 mak votante) Jezuita sira ba na’in 7 (votante na’in 4), Frade Menór sira no padri bianchi iha eleitór foun ida. D. Marengo mak misionário Consolata dahuluk atu hatais faru mean/púrpura. Nune’e mós D. Fernando Vérgez Alzaga  –  Prezidente “Pontifícia Comissão para o Estado da Cidade do Vaticano e Presidente do Governatorato do Estado da Cidade do Vaticano”, kardeál dahuluk ba ‘Legionário de Cristo”.

Indumentária ka hatais

Hatais korál kardeál sira-nian hanesan ho bispu sira-nian, maibé ho kór mean púrupura (‘purpuradu’), atu simboliza disponibilidade ba martíriu mós; galero (prezente iha brazaun eráldiku) nia kór mean, envezde verde.

• solidéu: Amu-Papa ka ninia delegadu mak entrega;
• mitra: mutin atu uza iha konselebrasaun sira;
• barrete: husi hena-seda,  dalaruma husi kulit, sinál dignidade ekleziástika;
• kadeli: hahú uza husi sékulu XII, fó ba kardeál titulár kreda sira-nian nu’udar sinál jurisdisaun no fidelidade ba Amu-Papa;
• brazaun: hatudu dignidade kardeál nian nu’udar prínsipe Kreda nian no esklui títulu nobre seluk, hodi fó direitu ba brazaun pesoál rasik;
• títulu: hodi iha dignidade prínsipe nian, sira hetan rekoñesimentu no tratamentu nu’udar “Eminentíssimu Prínsipe” ka “Eminénsia”;
• mozeta ka mursa: kapa badak ida ne’ebé taka kabás, parte kotuk. Nia uza iha sobrepelíz leten nu’udar parte hatais korál nian.

Sira ne’ebé Amu-Papa hili atu sai Kardeál, sira hetan knaar atu partilla ho Kristu nia Vigáriu solisitude ba Kristu nia Kreda iha mundu tomak.

(JG)