Kapítulu jerál online – Abertura Ezersísiu Espirituál

Mornese – Ohin, 10 Setembru 2014, iha Mornese, hahú Ezersísiu espirituál ba partisipante na’in 194 ba Kapítulu Jerál da-23 iha istória Institutu FMA Nian. Entre sira ne’e na’in 16 husi Konsellu jerál, inspetora na’in 77 , superiora vizitadoria na’in 5, delegada na’in 92 no konvidada na’in 4.

Madre Jerál Yvonne Reungoat loke Ezersísiu Espirituál ho konvite atu tama iha odamatan ne’ebé lori ita mai Mornese. “Jezús mak lori ita mai iha-ne’e, ita ida-idak no ita hamutuk”, atu moris enkontru ida “espesiál, úniku, foun  iha ita-nia moris”, halo sai “enkontru boot, enkontru loos ho Jezús, oin ho oin no liuhusi Nia ita hasoru ema hotu, foin-sa’e sira”.   Maria Domenica Mazzarello mak sei tulun kapitulár sira atu husik sira-nia fuan nakonu ho laran-manas ba Jezús, atu tama iha “relasaun foun no freska ho Jezús, la’ós buat ida pesoál, maibé liuhusi kapitulár sira ba Institutu tomak”.

Pregadór Ezersísiu Espirituál mak Mons. Thomas Menamparambil, arsebispu eméritu salezianu husi Gwahati-India, ne’ebé sei tulun atu hakle’an fundamentu ita-nia fiar iha Maromak no iha Jezús Kristu nia Oan, atu moris iha ksolok bolun nian ba vida relijioza, iha sasin fraternidade nian no iha misaun evanjelizasaun nian ne’ebé Institutu soi iha Kreda, ne’ebé tuir Madre jerál la’o ho nesesidade no dezafiu sira ohin nian: “Ita presiza kualifika hikas ita-nia fiar, eh husik Jezús kualifika hikas ita-nia fiar. La’ós ho teoria no doutrina foun, maibé ho moris ida domi nian”. Sínodu evanjelizasaun tinan 2012 nian subliña katak “destinatáriu uluk evanjelizasaun nian mak ita, sarani sira. Evanjelizasaun foun sei halo evanjelizadór/a foun”.

Madre Yvonne mós husu  ba kapitulár sira atu “akolle tua foun iha kusi foun”. Nia husu atu iha atensaun atu la hili tua tuan ne’ebé ita toman tiha ona. Nia dehan katak dala barak ita gosta tua tuan, ne’ebé loos duni di’ak, maibé bele sai perigozu tanba ita lakon kapasidade atu hili buat foun.

Ezersísiu espirituál sira ba Kapítulu sempre halo iha Mornese, tanba Mornese mak FMA sira nia uma dahuluk, rai santa, rai moris nian no “iha-ne’e mak ita tenke mai atu iha kontaktu ho ita-nia abut… hafoun an iha ita-nia bee-matan”.

Madre Yvonne subliña atitude rua, “konfiansa  no esperansa” aleinde silénsiu  no raronak atu atua konfrontu vitál, konfrontu aliansa domin nian ho Na’i, husik Espíritu Santu hakohak ema ida-idak. Ezersísiu espirituál mak tempu abandonu ba Maromak nia hakaran hodi halo nia sai tempu renovasaun interiór no importante ba dalan santidade nian, no tempu ida-ne’e importante liu tanba ba vida Institutu nian, no ba vida Insitutu nian importante liu mak santidade.

Ikusmai Madre Jerál konvida atu kontempla Maromak no  tama iha Ezersísiu Espirituál liuhusi periferia, husi ita-nia pobreza sira atu husik Na’i gia ita. Husi periferia Mornese nian, husi ita-nia fuan roman ida sei naksira ba mundu tomak, se “ita husik Maromak orienta ita-nia perkursu”.  Nia halo votus atu Ezersísiu Espirituál ne’e sai “kaskata ida grasa nian ne’eb’e haraik mai ita vida foun, forsa foun, dinamizmu foun atu hadaet liuhusi dalan ita-nia Kapítulu nian, no nune’e bele sai fonte moris nian ba irmán barak, foin-sa’e barak, ba labarik barak, no ita seguru katak Maria ho ita, akompaña ita, tahan ita, kaer ita-nia liman”.

Iha omilia mons. Thomas foka ninia omilia iha papél Espíritu Santu nian ne’ebé lori dinamizmu foun iha fatin sira ne’ebé hetan problema, sai malirin iha entuziazmu, bainhira buat hotu hanesan imposivel. Ida-ne’e fó esperansa mai ita, katak ho Espíritu Santu, ita bele habelar esperansa iha mundu tomak,katak Maromak la husik ita mesak.