Selebra primero aniversario grupo Palomino

Domingo,29 de maio de 2022

Comunidade Beata Eusebia Palomino Comoro, ohin 29 maio 2022, Selebra tinan ida existensia grupo Foinsa’e Volontariado Palomino Salesiana (FVPS) ho madre FMA sira iha Komunidade.  Grupo Palominos halo ninia tinan iha dia 2 de maio maibe la possivel atu selebra iha loron ne’ebà ho nune’e ami selebra mai fali ba loron ohin. Ami selebra Misa agradesimentu nian iha dia 1 de maio no ohin kalan ami hamutuk hodi fahe ba malu ksolok ho hahan simples ne’ebè ida idak lori mai tau hamutuk hodi hametin ami nia amizade no unidade. Ami ne’ebé mai iha kalan, hamutuk 29 pesoas, balun ba ona estuda iha rai liu no balun iha preukupasaun seluk.

Ami nia aniversario marka ho novidades furak ohin nian ne’ebe Amo Papa fo sai  katak Arcediocese Dom Virgilio di Carmo, Bispo Dili  sai nu’udar Cardial. Hamutuk ho Madre sira ami haklalak no agradese ba Maromak nia domin ba Kreda iha rai Timor. Iha Buona noite madre Jacinta madre superiora komunidade nian, hato’o mensajen korajen no esperansa nian ba ami, hodi konvida ami atu sai nafatin joven grupo Palomino atu nafatin sai exemplar diak, no lao ba oin nafatin. Grupo buras liu tan hodi halo plano ba formasaun no aktividade sira hodi serbi maluk sira nebe presia tulun, maibe mos ba grupo nia diak.  Maske halo dalan iha tinan ida ne’e no ho responsabilidade anima ona Liturgia hodi sai coro iha Parokia no halo limpeza iha Parokia kada fulan. Se mak hatene loron ida imi mak bele hahu grupo Vides internasional iha Timor karik.  Diskurso tuir husi Chefi Palomino ne’ebé agradese ba Maromak, ba komunidade no ba membro ida idak ba dalan ne’ebè halo ona iha tinan ida nia laran, no ho Maria ita inan nia tulun ita bele kontinua halo dalan, plano ba tinan ida ne’e ba oin nafatin nudar joven Palomino ho responsabilidade no sente fatin ida ne’e nudar uma no bele harii komunidade ida ho madre sira. Nia hatutun tan katak kalan ida ne’e ami hotu haksolok tebes bele celebra eventu ne’e ho madre sira hotu no han hamutuk, ita nia hamutuk mak hametin ita nia unidade no haburas liu tan grupo nia esperansa.

Molok han ami iha acara koa Kuek aniversario Palomino akompña ho musika Happy Birth day.  ne’ebà ami krea klima familiar no spontaña hodi sente nudar uma nain, no haksolok tebes ho musak, dahur no ho komprimisu atu fial fali mai iha Domingo atu halo plano anual ba ami nia grupo nia misaun, tamba hare ba tinan ida ona ami hametin grupo ho ami nia esforso hotu, ho ami nia komprensaun ba malu no ami nia kolaborasaun nudar maun alin no feton naan ba malu.

Molok fahe malu ami Agradese Nai Feto ba diak hotu ne’ebè ami simu husi Maromak, liu husi komunidade ida ne’e nia disponibilidade no domin nebe simu ami nudar ami, no ho pasensia tulun halo dalan ho ami, madre sira sempre tulun ami durante ami halao aktividade e sai hanesan inan no mahon ba ami. madre sira mak sai beata Eusebia Palomino moris ba ami ida idak. Ikus liu, ami ho esperansa entrega ami nia mehi no ami nia aktividade tinan foun nian ba Nai Feto nia tulun.

(Palomino: Danilo Barreto)