Dili – Iha Domingu VI Páskua nian, 22 Maiu 2022, krizmandu na’in 663 simu Sakramentu Konfirmasaun husi Arsebispu D. Virgílio do Carmo da Silva SDB, iha parókia Maria Auxiliadora, Comoro-Dili. Krizmandu sira-ne’e simu preparasaun intensiva ba fulan tolu. Entre formadora sira iha FMA na’in neen: Ir Teresinha iha formandu na’in 43; Ir Aurea iha na’in 32; Ir Noemia iha na’in 12; Ir Jacinta Gusmão iha na’in 30; Ir Julia iha na’in 37; Ir Simoa iha krizmandu na’in 28.

Husi batizmu ba krizma

Iha batizmu ita-nia inan-aman mak hatán mai ita iha profisaun fiar nian. Iha krizma ita rasik nu’udar ema adultu, konfirma buat ne’ebé ita-nia inan-aman profesa.

Batizmu mak fundamentu moris sarani tomak nian ne’ebé halo ita sai kriatura foun, hasai ita husi salan orijinál halo ita Maromak oan, Jezús nia maun-alin sira no membru Kreda nian, halo ita sai sarani. Ho batizmu Jezús haraik mai ita don FIAR, ESPERANSA no KARIDADE, virtude teologál sira. Aleinde ne’e ita partisipa iha funsaun espesiál tolu: amlulik, profeta no liurai.

Ho tempu bainhira ita sai boot ita aprende atu hala’o funsaun tolu ne’e.

Krizma mak sakramentu ne’ebé halo ita sai sarani perfeitu, haraik mai ita forsa atu sai Kristu nia sasin. Hodi simu Krizma ita simu ho modu espesiál don sira Espíritu Santu nian. Don hitu Espíritu Santu nian mak sabedouria, intelijénsia, konsellu, fortaleza, entendimentu, piedade nno hamta’uk Maromak. Krizma halo ita bele hala’o funsaun tolu ne’ebé imprime ona iha ita-nia karákter ne’ebé labele halakon: amlulik, profeta no liurai, tuir Kristu nia ain-hakat.

Efeitu sira husi Sakramentu Krizma

• Sakramentu Krizma eh Konfirmasaun, haboot, KONFIRMA, ita-nia fiar, fiar ne’ebé ita profesa iha ita-nia Batizmu;
• Kria uniaun boot no forte ho Aman no ho Jezús Kristu, hodi sai ba nia maun no alin sira, sai ninia Apóstolu no manu-ain;
• Imprime iha ita marka espirituál ne’ebé labele halakon, hanesan akontese iha Batizmu, “KARÁKTER”. Sakramentu ne’e ita simu dala ida de’it;
• Halo ita sai membru ativu/a Kreda nian, sai ida de’it ho Maromak nia família.