Maria iha esperiénsia FMA nian iha uma S. João Bosco Balide  (Dili-Timor) iha tinan 1999 depoizde referendu 30 Agostu 1999

Esperiénsia Maria nian forte tebes depoizde Referendu 30 Agostu 1999 nian atu determina autonomia ka independénsia. Iha 31 Agostu, tan ta’uk, populasaun sira husu abrigu iha FMA nia uma iha Balide. Irmán sira simu de’it mak inan ho oan sira liu atus tolu. Enkuantu hein rezultadu referendu nian, milísia sira halo sira-nia asaun hosi provoka ta’uk, estragu no mate.

Husi loron 2 Setembru hahú rona tiruteiu sira ne’ebé halo la’ós uma de’it maibé fuan sira nakdedar. Hodi hanoin Don Bosco nia fiar iha tempu kólera nian iha Torino, Irmán sira fahe ba hotu medalla ida Na’i-Feto Maria Auxiliadora nian no husu Virjen Beran Boot nia protesaun husi aat hotu. Aleinde ne’e, Irmán sira tau mós medalla Maria Auxiliadora nnian iha uma nia sorin haat no iha pátiu ho laran-metin katak Maria beran boot liu ezérsitu funu nian ida.

Notísia katak milísia  sira hamosu terrór, ataka, oho, naok no sunu uma sira, no impede mós timor-oan sira atu sai bá fatin seluk, orasaun sai forte liután, orasaun rozáriu la para, hodi fahe ba grupu-grupu, família sira troka malu atu ba reza iha kapela.

Iha loron 4 Setembru anúnsiu boot Kofi Annan nian katak 78% Timor-Oan sira lakohi autonomia no hili independénsia. Maski haksolok, ema hotu ta’uk no labele esprime sira-nia ksolok.

Milísia sira hala’o asaun terrór nian iha fatin hotu.Kalan tomak Irmán no família sira halo velada orasaun nian iha silénsiu no ho laran-manas.

Iha loron 5 Setembru Ir Paola Battagliola hetan imajen boot sira Maria Auxiliadora nian no hamutuk ho Irmán sira, sira tau iha portaun entrada nian no iha muru uma oin nian. Sé ema ruma hakarak tama, nia tenke enfrenta uluk Na’i-Feto Maria Auxiliadora ne’ebé Irmán sira no refujiadu sira invoka nafatin atu tulun iha “susar laran”… Nia, kbiit boot liufali ezérsitu ida funu-na’in nian.

(Fonte: Cronaca 1999)