Maun no niin-alin doben sira, domingu di’ak!

Iha Evanjellu Liturjia ohin nian Jezús, hodi fó adeus ba ninia eskolante sira iha han-kalan ikus, dehan, hanesan testamentu ida: «Ha’u husik dame ba imi». No hatutan kedas: «Ha’u fó  ha’u dame ba imi» (Jo 14,27). Ita para iha fraze badak sira-ne’e.

Uluknanai ha’u husik dame ba imi. Jezús despede ho liafuan sira ne’ebé esprime afetu no hakmatek, maibé nia halo iha momentu ida-ne’ebé dook husi hakmatek. Judas atu faan nia, Pedro atu nega Nia, no hotu-hotu kuaze atu abandona Nia: Na’i hatene, maski nune’e nia la haksiak sira, la uza liafuan todan, la halo diskursu maka’as nian. Envezde hatudu ajitasaun, nia hela ho laran-mamar to’o rohan. Provérbiu ida dehan katak ema matehanesna nia moris. Jezús nia oras ikus sira defaktu nu’udar nia moris tomak nia esénsia. Nia esperimenta ta’uk no sofrimentu, maibé nia la fó fatin ba rai-hirus no protesta. Nia la husik atu laran-moruk domina, nia lafakar sai, nia la hatudu terus. Nia iha dame laran, dame ida ne’ebé mai husi nia fuan maus, ne’ebé laran-metin horik bá. No husi ne’e mak suli mai dame ne’ebé Jezús husik mai ita. Basá labele husk ba dame ba ema seluk se ema la iha dame ne’e iha nia an. Ema ida labele fó dame se nia moris ho dame.

Ha’u husik dame: Jezús hatudu katak posivel iha laran-maus. Nia inkarna iha momentu ne’ebé difisil liu; no hakarak atu ita mós komporta hanesan nia, ita ne’ebé simu nia dame nu’udar liman-rohan. Nia hakarak ita maus, nakloke, disponivel ba raronak, hatene atu hakotu istori -malu no hakiak armonia. Ne’e katak fó sasin kona-ba Jezús no ida-ne’e folin liufali liafuan  rihun ida no pregasaun barbarak. Sasin dame nian. Ita husu se, iha fatin sira it amoris bá, ita, Jezús nia eskolante sira komporta an nune’e: hamamar tensaun sira, hamate konflitu sira? Ita mós iha sirkuitu ho ema seluk, prontu nafatin atu reaje, atu nakfera, ka hatene hatán lahó violénsia, hatene hatán ho jestu no liafuan dame nian? Oinsá ha’u reaje” Ida-idak husu ba an rasik.

Loos duni, laran-maus la’ós fasil: susar atu halo, iha nivel hotu, atu hamamar konflitu sira! Iha-ne’e mai Jezús nia fraze daruak atu tulun ita: ha’u fó ha’u-nia dame. Jezús hatene katak mesmesak ita labele mantein dame, katka ita presiza tulun ida, don ida. Dame, ita-nia empeñu ida, uluknanai mak don ida Maromak nian. Defaktu Jezús dehan: «Ha’u fó ha’u dame. La’ós hanesan mundu fó, ha’u fó ba imi» (v. 27). Sá loos dame ne’ebé mundu la hatene no Na’i haraik mai ita? Dame ne’e mak Espíritu Santu, Jezús rasik nia Espíritu. Ne’e mak Maromak nia prezensa iha ita, me’e mak “forsa dame nian”. Nia, Espíritu Santu, mak dezarma fuan no hakonu ho hakmatek. Nia, Espíritu Snatu, mak hamamar rijidés no hamate tentasaun sira atu halo agresaun ba ema seluk. Nia, Espíritu Santu, mak fó hanoin mai ita katak sira iha ita-nia sorsorin mak maun no biin-alin sira, la’ós obstákulu no funu-balu. Nia, Espíritu Santu, mak fó mai ita kbiit atu perdua, atu hahú hikasfali, atu halo fali dalan, nasá ho ita-nia forsa rasik ita labele. No ho Nia, ho Espíritu Santu, mak ita sai mane no feto sira dame nian.

Maun no biin-alin sira, laiha salan ida, frakasu ida, laran-nakali ida mak tenkedezanima ita atu husu ho insisténsia don Espíritu Santu nian ne’ebé fó dame mai ita. Hetok ita sente fuan la hakmatek, hetok ita sente iha ita-nia laran nervozimu, intoleránsia, laran-nakali, iita hetok tenke husu liután ba Na’i, Espíritu dame nian. Mai ita aprende atu dehan loroloron: “Na’i, haraik ita dame mai ha’u, haraik Espíritu Santu mai ha’u”. Orasaun furak ida. Ita dehan hamutuk? “Na’i, haraik ita dame mai ha’u, haraik Espíritu Santu mai ha’u”. No ita husu mós ba ema sir ane’ebé mpris iha ita-nia sorsorin, ba ema ne’ebé ita hasoru loroloron, no ba responsavel Nasaun sira-nian.

Atu Na’i-Feto tulun ita simu Espíritu Santu atu sai ema mahalok dame nian.