Laga – Ohin, loron 21-5-2022 realiza formasaun pastoral konjunta daruak ho objetivu atu halo formasaun hamutuk nudar equipa Pastoral juvenil konjunta (SDB, FMA, Cooperador Salesiano, Membro MJS ne’ebé hala’o oratorio hamutuk) no apresentasaun draft program ba FORUM MJS 2022 husi strutura MJS Nazional.

Partesipante mak padre, madre leigos no reprezentante animador husi kada oratorio, hamutuk ema nain 52 falta deit presenza husi Zona I, ne’ebé realiza iha Komunidade Beata Laura Vicuna, Laga.

Enkontru ne’e hahu ho formasaun kona ba “Plataforma Laudato si” ka Laudato si’ Goals ne’ebé preside husi Madre Julia FMA. Iha ne’e sai mos formasaun zonal daruak ba animador sira. Iha Formasaun ne’e madre apresenta kona ba objetivu hitu Laudato si hodi konvida fali hotu hotu nia atensaun kona ba proteje uma komun, liu-liu husu atu animador sira atu koñese, komprende no tau ba pratika konkretu dokumento Ensiklika Laudato Si hodi assume nudar estilo moris nian no halo dalan konversaun ekolojia hamutuk ho objetivu hitu iha realidade moris rasik, katak ida idak moris Lauduto si’, hodi nune’e bele tulun alin sira iha familia, oratorio ka iha misaun. Objetivu hitu mak tuir mai ne’e:  hatan ba mundu nia hakilar, kiak sira nia hakilar, ekonomia ekolojia, estilu moris simples, edukasaun ekolojia, espiritualidade ekolojia no partesipa husi komunidade ba asaun konkretu laudato si. Molok fo tempu ba assemblea madre apresenta katak animador sira husi Dili balun forma dadaun ona grupo Laudato si joven Don Bosco Timor Leste, atu koko atu haklean no halo sosialisasaun kona ba objetivu hitu Laudato si. Madre mos konvida animador sira hotu ho oratoriano sira, atu hatene rona no la’o hamutuk iha diresaun ida deit ho kapasidade no entusiasmo juvenil hodi fo kontribuisaun atu kuida ambiente no kuida ema iha oratorio no iha fatin hotu iha ne’ebé Maromak tau ida idak ba, tamba iha ne’eba mak ita sei buras.

Tuir, mai fo tempo ba asemblea hodi fahe sira nia reflesaun no fahe sira nia esperiensia significative sira ne’ebé hahu halo dalan dadaun ona nudar pesoal no nudar grupo. Maibe liu liu fo korajen ba malu atu keta kole no keta lakon esperansa atu kontinua dalan konversaun ekologia ho esperansa katak neneik-neneik sei bele troka ema nia mentalidade ba ekolojia.

Iha dokumento ne’e fo mos korajen ba ita fiar nain sira atu hatene halo dalan dialogo no amizade nian ho maluk sira husi relijaun seluk ka fiar lahanesan atu hamutuk proteje ita nia planeta hodi harii mundo ida nebe diak liu ba jerasaun ne’ebé sei mai tuir ita.

Iha momento daruak, Padre Nelson Soares, SDB no membro Strutura Nazional MJS apresenta draf Programa Forum MJS ba tinan 2022 ba enkaregados/as MJS local no animador sira husi kada oratorio, mak sai objetivu daruak ba sorumutu ne’e. Depois de Presentasaun, fo tempu atu sira bele hato’o sira nia observasaun no komentario ruma. iha momentu ne’e hamosu proposta barak, entre sira mak husu atu bele realiza FORUM iha tempo ferias Agosto nian, maibe husi parte PJ Konjunta hare katak data sira ne’e dedika ona ba evento Krus Joven no inkui mos ba eventu sira seluk iha Congregasaun laran. PJ konjunta hamutuk sei konsidera proposta sira hotu ne’ebé hato’o iha asemblea hodi serbisu hamutuk diak liu tan no buka buat ne’ebé diak ba foinsa’e sira nia diak no tuir Maromak nia hakarak.

Molok remata enkontru, Padre Nelson, agradese ba ida-idak nia disponibildade ne’ebé marka ona presenza no hili tan data seluk ba enkontu tuir mai ba preparasaun ikus ba FORUM MJS. Enkontru remata ho memento fraternizasaun.

Ikus liu, Foinsa’e sira ho ksolok hato’o sira nia agradese wain ba Me. Ligia no komunidade FMA Laga ba sira nia disponibildade no laran luak iha ne’ebè prepara aihan midar no fatin diak ba sira, hodi halo sira sente uma.

(Onesiana, FMA)