Dili – Iha loron 17 Maiu 2022, Governu Itália liuhusi Embaixadór Indonesia nian, Señor Benedetto Latteri, konfere kondekorasaun onra nian “Cavaliere della Reppublica” ba Padre Eligio Locatelli, misionáriu iha Timor husi kedas tinan 1964, fain iha Nunsiatura, Dili. Kondekorasaun ne’e resalta ninia servisu kolen-laek ba evanjelizasaun no edukasaun, servisu sosiál no ekleziál ba povu Timor.

Prezente iha serimónia konferimentu kondekorasaun nian Papa Francisco nia Reprezentante iha Timor-Leste Mons. Marco Sprizzi, Arsebispu Dili AMu Virgílio Do Carmo Da Silva SDB, P. Apolinário Maria Ornai Neto, SDB (Provinsiál ITM), Ir Alma Castagna (provinsiál FMA TIN) no italianu sira seluk no bainaka sira.

Pe. Locatelli aseita simu kondekorasaun ne’e maibé hodi misionáriu/a italianu sira ne’ebé saran sira-nia moris iha Timor, husi kedas espedisaun 1927-1929 ho misionáriu italianu na’in lima: Pe. Erminio Rosetti (superiór) no Santu Callisto Caravario (momentu ne’ebá klérigu) aleinde Irmaun na’in tolu italianu mós: Luigi Venturelli (mestre kadó nian), Roberto Verona (mestre karpinteiru) no Antonio Narciso (factotum). Entre sira ne’e iha mós portugés ida padre António Carvalho. Misaun ne’e dura de’it tinan rua.

Iha tinan 1946 mak hahú fali misaun daruak iha Timor ho padre italianu ida naran Anibale Vigheti ho misionáriu portugés seluk.

Padre Eligio Locatelli to’o iha Timor iha tinan 1964 no halo parte grupu pioneiru misaun saleziana iha Fatumaka no  fundadór koléjiu Don Bosco, ne’ebe nia hela bá to’o ohin loron.

Pe. Elígio Locatelli, sdb, husi Itália, moris iha Bretonvillers (Fransa), iha Loron 7 Fevereiru 1937. Nia moris husi Aman naran Attilio Locatelli no Inan naran Fiorenzina Locatelli. Padre Locatteli hahú ninia aspirantadu iha Chieri, no sai novisu iha Moutodine iha tinan 1953 to’o 1954. Padre Elígio Locatelli halo votu perpétuu sura iha iha Goa/índia iha tinan 1960. Nia simu ordenasaun amlulik iha Lisboa iha 19 Juñu 1964, no depoizde simu ordenasaunpadre Locatelli deside sai misionáriu iha Timor fulan Outubru tinan 1964 hodi hela iha Fatumaca to’o ohin loron.

Nune’e, padre Locatelli ho nia prezensa iha rai Timor ba tinan 58 moris períodu istóriku Rei ne’e nian iha períodu kolonizasaun portugeza, iha períodu invazaun indonezia nian no iha períodu independénsia nian. Tan ninia kontribuisaun boot ba independénsia no país nia dezenvolvimentu, iha 20 Maiu 2016, iha okaziaun komemorasaun aniversáriu da-14 restaurasaun independénsia Timor-Leste nian, padre Eligio Locatelli simu kondekorasaun aas liu TL nian, “Grande Colar da Ordem de Timor Leste”.

Iha 29 Marsu 2019 Padre Locatelli hamutuk ho Pe. Francisco dos Santos Fatima Barreto, Pe. Francisco Tavares, Pe. Jose Alves Martins SJ (Portugal), no Madre Maria Chioda FDCC (Italia), simu kondekorasaun ‘Pro Ecclesia et Pontifice” husi Vaticano, liuhusi reprezentante Santa Sé nian, Mons, Marco Sprizzi. Kondekorasaun ‘Pro eEcclesia et Pontifice” mak kondekorsaun onra nian husi Am-Papa ba kontibuisaun estraordinária ba Kreda.