Venilale, Iha loron 14 Maiu, ETV Santa Maria Mazzarello selebra festa Padroeira Eskola nian hamutuk ho  aman  inan mak sai ona tradisaun ba eskola ida ne’e, iha ne’ebé aleinde halo festa hamutuk nu’udar familia, iha mos oportunidade atu inan aman hatene kona-ba prosesu aprendizajen oan sira-nian, liu husi nota iha kaderneta no mos halo expo kona-ba bebidas, kulinária no resepsaun. Maibé tanba pandemia kovid-19 tinan rua tutuir malu la bele realiza. Nune’e, ohin realiza fali atividade hirak ne’e, liliu expo.

Preparasaun ba festa ne’e hahu ho Tridum ne’ebé estudante ETV hotu tuir iha dader oras buon giorno nian. Hafoin iha loron 12 loraik, halo jogus animados hanesan; pinta,  volley kada klase, kuiz husu no hatán.

Nune’e ohin, loron 14 Maiu, komunidade edukativu, estudante ETV hamutuk ho Inan Aman no familia Saleziana iha Venilale selebra festa padrueira eskola nian Santa Maria Domingas Mazzarello, Kofundadora ba Institutu Filhas de Maria Auxiliadora. Festa hahu ho Eukaristia santa ne’ebé presidi husi Pe. Olivio Da Costa SDB, iha parokia Sagrado Coração de Jesus Venilale. Iha homilia Amu selebrante hateten katak; ”Laiha dalan korta atu hetan santidade, maibé tenke tuir dalan prosesu atu bele sai santu/a. Madre Mazzarello hala’o ona prosesu ou halo dalan iha ninia moris, liu husi susar -terus, sakrifisiu, hahalok karidade nian, hatudu simplisidade no haraik-an, hadomi Maromak no hadomi foin-sa’e sira. Madre Mazzarello nia ezemplu sai mós ba ita nu’udar inan aman no familia Saleziana, atu moris tuir ita idaidak nia serbisu hafoin hadomi Maromak no hadomi foin-sa’e sira nune’e ita bele to’o iha santidade.

Hafoin iha momentu agradesimentu nian, grupu Asosiasaun Madre Mazzarello nian hamutuk na’in Sanulu resin neen, halo komprimisu atu fiel no prontu moris  tuir vizaun no misaun Asosiasaun ne’e nian liuliu Madre Mazzarello nia virtude sira.

Tuir mai, fó oportunidade mos ba aman inan atu koñese Madre Mazzarello nia moris liu husi vizita fatin sira ne’ebé kada asosiasaun prepara; MORNESE, JANELA VALPONASKA, BORGO ALTO, UMA IMAKULADA, KOLÉJIU, NIZZA MONFERRATO no SAINT CYR ho esplikasaun no mós ho drama. Maske loron manas maibé inan aman iha hakarak boot koñese Madre Mazzarello hodi konsege vizita hotu fatin hirak ne’e ho pasiensia.

Hafoin han hamutuk nu’udar familia.  Ikus, Ir. Carolina Correia FMA nu’udar diretora komunidade nian, hato’o lia fuan ba inan aman hodi dehan katak Madre Mazzarello feto agrikultor ida nia oan maibé ho ninia Sin ba Na’I hamutuk ho nia maluk sira na’in 11 ohin loron irmán sira eziste iha kontinente 5  no atu selebra tinan 150 fundasaun Institutu nian, ne’ebé ho misaun taumatan ba foinsae no labarik sira. Hafoin Ir. Carolina aprezenta mós ba familia estudante konaba komunidade nia ezistensia iha Timor no Indonézia. Hafoin husu ba inan aman atu kontinua serbisu hamutuk ba oan sira nia estudu no futuru. Hafoin taka ho drama Madre Mazzarello nian.

Ir. Alice Filipe FMA