Dili – Iha 13 Maiu loron mak loron solenidade Santa Maria Mazzarello nian. Iha loron ne’e iha Comoro, Dili, FMA sira festeja hamutuk ho Família Saleziana sira ho Misa iha Salaun TOT nian, oras tuku 18:00 prezide ba Eukarista Santa ne’e mak Padre Nelson Gonçalves SDB hamutuk ho konselebrante padre Saleziano na’in 7.

Iha Padre Nelson nia omilia nia foti pontu importante husi Madre Mazzarello nia moris mak uluknanai hare katak Maromak mak domin no  Maromak hili ema ne’ebé simples no haraik an sira.. Iha Evanjellu dehan katak Maromak tau matan ba hirak ne’ebé nia laran monu. Santa Maria Domingas Mazzarello, santa husi rai Mornese. Nia ajuda nia inan aman oinsá tau matan ba família tanba nia mak feto boot, nune’e nia serbisu makaas. Husi kiiik kedas nia hadomi ona Jezús ho jestu ne’ebé nia hatudu mak bainhira kalan nia prepara ona buat hotu ba família atu dader nia la tarde iha misa, tanba domin boot ba Jezús. Nia mos hatudu nia domin ba ema seluk liu –liu mos ba nia parenti sira ne’ebé presiza nia tulun maski ikus mai nia sei hetan moras hanesan sira.

Buat hotu ne’ebé nia halo, liu –liu ajuda ne’ebé nia fo ba ema moras sira ne’e, nia hetan forsa husi Maromak , tanba husi kiik kedas Nia aprende ona husi  Papa kona ba moris orasaun nian.

Nia domin boot ba nia família, ba ema seluk, ba Maromak e ba foin-sa’e sira to’o nia rona lian ida iha laletek Borgoalto nian ne’ebé dehan:  “Hau Entrega sira ba O” tau matan ba sira. Nia domin hatudu  laos deit husi lia fuan maibe husi hahalok konkretu ne’ebé nia halo mak loke uma alfaite hamutuk ho nia belun Petronila, liu –liu tulun foin-sa’e feto sira atu aprende suku maibe tempu hanesan aprende mos Katekese iha grupu laran.

Wainhira remata Eukaristia Santa  kontinua kedas ho konfraternizasaun Família Saleziana,  hafoin divertimentu husi komunidade ida-idak.

Ikus nian taka ho liafuan husi Madre Provincial: Madre Alma Castagna, FMA  agradese ba Amu Salezianu sira nia prezensa, Kominidade Edukativa, foin-sa’e sira  ne’ebé ohin hamutuk selebra festa Madre Mazzarello nian hodi fó tempu ba prepara, liuliu ba sira ne’eb’e iha TOT.

Viva Madre Mazzarello….

(Ines Bartolo FMA)