Komunidade B. Maria Romero Cailaco, hamutuk ho estudante sira pre-eskolar no primaria São Domingos Savio Soruwaci, selebra festa Padroeiro Eskola nian hahu ho Misa nebe selebra husi Padre Basilio SDB, iha 6 Maiu 2022. Selebrasaun komesa ho Misa, hotu tiha Misa mak animasaun, merenda hamutuk no taka ho jogos sira.

Iha Misa Padre fo hanoin iha nia omilia hodi dehan : sarani hotu nia objetivu moris mak dalan santidade nian, Domingos Savio mak santu kiik ida nebe ho espiritualidade jigante, moris didiak nia projetu sira no buka duni Maromak hodi mate ba nia hakarak sira nebe halo nia dook husi Maromak. Husi leitura sira konvida ita atu labele selu aat ho aat, hanesan ema dehan : se ó halo diak ba ema nebe halo diak ba ó nee normal deit, se ó halo aat ba ema nebe halo diak ba o nee hanaran diaboliku, se ó halo aat hasoru ema nebe halo aat ba ó nee hanaran animaliku maibe o simu ho diak ema nebe halo aat ba ó mak heroiku ida. Ida nee mak Domingos Savio halo iha nia moris. Buka atu lahalo sala no labele hakarak atu halo sala.

(Komunidade Beata Maria Romero)