Venilale – Iha loron festa padroeiro São Domingos Savio nian ami labarik orfaun sira neʼebé la ba ferias iha familia haksolok tebes hamutuk ho mana kandidata sira no madre sira hodi selebra festa São Domingos Savio nian.

Iha selebrasaun Eukaristia, padre selebrante pe.Olivio SDB nia homilia dehan: Atu sai santu difisil maibé possivel ba sira neʼebé halo didiak sira nia knaʼar no hakaʼas-an halo tuir Maromak nia hakarak hanesan São Domingos Savio. Wainhira Domingos Savio rona Don Bosco nia homilia kona ba oinsa atu sai santu, iha buat 3 neʼebé atrai tebes nia:

– Laʼos difisil atu sai santu

– Iha premiu boʼot iha Lalehan ba sira neʼebé hakaas-an sai santu iha rai

– Maromak nia hakarak mak halo ita sai santu

Rona tiha Don Bosco nia homilia Domingos Savio hakaas-an halo ninia Propozitu sira:

– Hau sei ba konfessa no komunga bebeik

– Iha loron festa sira hau sei halo didiak nuʼudar loron santu

– Jesus no Maria mak sei sai hau nia belun

– Diak liu mate duké halo sala.

Husi Festa São Domingos Savio nian fo hanoin mai ita ida-idak katak santidade ba ema hotu maibe liuliu ba sira neʼebé hakaas-an atu sai santu iha rai tanba premiu boot hein ita iha Lalehan.

Boa Festa São Domingos Savio nian ba ita hotu.

(Komunidade Maria Auxiliadora Venilale)