Dili – Depoizde simu programasaun husi Konsellu Jerál FMA, Inspetoria TIN dedika loron sira husi 29 Abríl to’o 3 Maiu ba programasaun tinan neen nian. Prezente iha programasaun ne’e FMA na’in tolunulu-resin-tolu no joven no leigu hamutuk na’in ruanulu-resin-neen.

Vizaun husi Kapítulu jerál 24 mak sai “Prezensa ne’ebé fó moris” no deklina iha ninia hilin tolu hanesan: Prezensa ne’ebé hatene rona; Prezensa ne’ebé la’o hamutuk; no Prezensa komunitária ne’ebé sai” no iha rede.

Husi Hilin tolu ne’e asembleia ba programasaun serbisu atu identifika uluknanai dezafiu sira atu rona, atu moris iha sinodalidade no ba ekolojia integrál. Hafoin halo liña asaun sira no modalidade sira.

Iha-ne’e ami haktuir liña asaun sira hanesan tuirmai ne’e: rona no hatán ba pedidu edukasaun no formasaun nian husi ema, komunidade, foin-sa’e sira liuliu grupu marjinalizadu siea ho sira-nia realidade no kultura, iha sinál sira tempu ohin nian; Projeta, hala’o formasaun hamutuk no akompaña dalan formativu espesífika sira ne’ebé hatán ba pedidu kontemporaneidade nian; Hafoun hikasfali ita-nia identidade mariana iha proposta edukativa sira; forma an iha fiar hodi hakbesik ba Maromak nia Liafuan hodi prepara an ba tinan jubileu iha “peregrinasaun esperansa” nian.

Aleinde programa ba tinan neen,  ohin iha 3 Maiu grupu sira fó proposta ba selebrasaun tinan 150 fundasaun Institutu nian. Entre proposta sira ne’e iha kompetisaun ho forma oioin ho objetivu atu koñese Institutu no nia karizma, preparasaun espirituál ho obra mizerikórdia sira no ho rekonsiliasaun, inaugurasaun estátua Maria Auxiliadora iha Cailaco no ikus nian taka ho loron gratidaun inspetoriál.

Iha liafuan maktakak, Ir Alma Castagna, inspetora , hato’o ninia agradesimentu ba kolaborasuan tomak: “Agradese ba hotu-hotu; bele haree katak hotu-hotu partisipa ativamente tan hakarak di’ak ba labarik, foin-sa’e sira. Dala ruma ita bele sai “roda kempes”, maibé ita buka kbiit husi Na’i atu bá oin. Estilu servisu iha ne’e, halo mós iha komunidade, sinodalidade, entre Irmán sira, leigu/a no foin-sa’e sira”.

(JG)