Fiar bá: sei mai loron ida ne’ebé Igreja livre husi  jentiu sira-nia persegisaun mate nian.

Tinan 313 , bainhira famozu “Editu Milano nian” nakfilak kristianizamu ne’ebé hetan persegisaun ba favoresidu husi imperadór romanu sira. Maibé lojikamente, luta la remata iha ne’e, basá iha époka hanesan erezia Ário nian kuda fini diskórdia nian iha katolisizmu nia laran. Nune’e mak fiar maka’as no dedikasaun iha defeza ba Kristu nia divindade transforma Atanásio, bispu Alexandria nian, iha kombatente maka’as liu ereje sira-nian.

Atanásio moris iha Ejitu iha 296, oan sidade ne’e nian, loron ida nia sei sia bispu ne’ebé ema barak la haluha. Sei adolexente, Atánasio konsideradu nu’udar ema intelijente liu Alexandria nian entre selebridade sira ne’ebé moris iha-ne’ebá. Nia tama iha Igreja liuhusi bispu Alexandria nian. Iha kualidade ninia susesór espesiál, maski ho tinan 33 no sei diákonu hela, Atanásio partisipa iha Konsíliu Nicéia nian, iha 325, bainhira nia hahú hola parte iha istória memorável  Igreja nian ida-ne’e.

Iha rejistru hotu Konsíliu nian, ne’ebé define arianizmu nu’udar erezia, naran Atanásio mak ida-ne’ebé sita liu.

Arianizmu nega Jezús nia santidade. Sira konsidera Kristu nu’udar  “kriatura ida Aman nian de’it” no la halo parte ba Nia, hanesan ho Nia. Hasoru erezia ne’e, Atanásio mak responsavel ida iha luta atu Igreja halo hikasfali dalan ne’ebé apóstolu sira define ona.

Iha istória haktuir katak Atánasio nia diskursu manas sira, ninia argumentasaun bíblika brillante no ninia doutrina klaru, esensiál ba defeza no manutensaun ortodoksia kristán. Nia hatudu erru istóriku no dogmátiku ereje sira-nian, hodi konkista vitória ba kauza katólika no, nia konsekuénsia mak ódiu boot husi arianu sira hasoru nia.

Aleinde buat ne’e hotu, nia mak relijiozu ne’ebé moris loloos nia fiar, dixípulu no kontemporáneu figura importante liu klero nian ne’ebé Igreja onra ho venerasaun iha altár sira, Bainhira bispu Alexandre nian mate, povu no kleru hili Atanásio nu’udar susesór. Ninia bispadu dura tinan 46 nakonu ho persegisaun no sofrimentu sira. Ho apoiu husi imperadór, arianu sira halekar kalúnia boboot hasoru nia. Atanásio terus ezíliu dala lima tutuir malu, interkala ho halai no hadook an ho ninia hakaran rasik, ne’ebé nia suporta ho pasiénsia no determinasaun.

Iha lala’ok sira-ne’e hotu mak Atánasio koñese Santu Antão, hodi hakerek ninia biografia, nune’e haktuir oinsá moris monástika iha rai-fuik maran, hodi dada sarani barak ba mosteiru eremita sira.

Atanásio mate ho tinan 77 iha loron 2 Maiu 373.  No nu’udar rekoñesimentu ba ninia serbisu lutadór kontra erejia sira no ninia obra doutrinál sira nia simu títulu Doutór Igreja nian.