Dili – Iha programsaun inspetoriál nia oráriu, nafatin hahú ho liturjia oras no liturjia eukarístika. Hafoin iha tuku 8.30 ba iha asembleia iha-ne’ebé hahú ho invokasaun ba Espíritu Santu hafoin aprezentasaun rezumu loron presedente husi Sekretária Provinsiál, Ir. Julia Marçal.

Moderadora loron sira programasaun mak Ir. Olga Belo, FMA . Nia mak introdús serbisu sira nomodera aprezentasaun no diskusaun sira iha asembleia. Ba loron daruak, 30 Abril 2022, Ir Olga fó tempu ba grupu tolu ne’ebé aprezenta kona-ba: Formasaun, Sínodu diosezana no Atividade ekolojia nian. Ir. Esmeralda Soares, FMA,  koordenadora ámbitu formasaun mak aprezenta formasaun inisiál to’o formasaun permanente iha Inspetoria TIN. Aleinde ne’e aprezenta mós dadu sira foti husi plataforma kona-ba destinatáriu sira formasaun nian iha oratóriu, eskola, animasaun formativa ba ADMA no Salezianu/a Kooperadór/a nst.

Tuir mai Irmán sira aprezenta sínteze serbisu sinodu nian husi Timor-Leste, Dioseze Dili no Baucau nian. Husi Dili Ir. Angelita, FMA mak hato’o no husi Baucau nian Ir. Olga, FMA mak hato’o. Husi Maliana nian la konsege esplika tanba sínteze husi dioseze seidauk prontu. Tuir mai Ir. Veronika Kusnadi, FMA mak aprezenta kona-ba Indonesia, maibé nia mós la iha iha liman rezultadu, Nia aprezenta mak modalidade serbisu nian ne’eb’e hala’o iha Keuskupan Agung Jakarta, ne’ebé tan tempu konfinamentu covid-19, halo online. Kona-ba atividade ekolojia nian aprezenta husi Ir. Julia, Ir. Aurea Marçal no Ir. Veronika. Júlia aprezenta kona-ba oinsá komunidade sira adere ba plataforma Laudato Si nian no Ir Veronika aprezenta atividade halo iha parókia Yohanes Bosco no Ir Áurea iha Palla ho oratorianu no SEKAMI.

Serbisu tuirmai mak ba iha grupu sira  tuir hilin priortáriu sira formasuan nian, sinodalidade nian no ekolojia nian atu haree hamutuk reapidade sira ne’eb’e ita enfrenta ohin loron. Depoizde serbisu grupu kontinua ho asembleia no halo sínteze dezafiu nian, ne’ebé sei sai baze ba asaun konkreta sira iha serbisu loron aban nian.

(Ekipa ComSoc TIN)