Dili – Tinan-tinan nafatin iha graduasaun ba Foin-sa’e sira ne’ebé tuir Kurso Komputadór iha “Centro de Formação Irmãs Salesianas Balide”. Iha tinan ida ne’e foin-sa’e sira hamutuk nain haatnulu-resin-rua halo graduasaun hodi simu sertifikadu nu’udar sira nia rezultadu durante halo Kursu iha fulan sanulu nia laran; Kursu hahú ho “ Typing” ba fulan rua, hafoin Komputadór ba fulan neen, ho programa “ Microsoft word, Publisher, Powerpoint, Excel no access, hafoin halo estájiu ba fulan rua iha fatin sira servisu nian. Durante tempu estudu nian, sira mós iha formasaun husi Irmán sira halao semana-semana iha loron sesta no iha Oratóriu.

Molok atu halo graduasaun, formandu/a sira ne’e halo preparasaun ruma hanesan; halo retiru ho Pe. Acaçio, SDB  iha loron 3/9/2014, ho tema “Sai ema responsavel iha sosiedade Multidimensaun” katak nafatin prontu atu hatán ho ksolok no fiél iha buat ne’ebé husu iha sosiedade nia laran; Hafoin kontinua ho sakramentu Konfisaun no Eukaristia. Ihaomilia Padre kontinua fó hanoin ba sira atu hatene loke fuan atu Na’i bele hakonu ho Ninia grasa ne’ebé liu husi sasin sira hanesan Edukadora sira ne’ebé tulun  iha sira nia formasaun no ho matenek ne’ebé sira hetan, buka mós atu sai sasin ba ema seluk ne’ebé sira sei hasoru iha sira nia moris.

Iha loron 6/9/2014, iha dadeer tuku 9:30, hahú ho serimónia graduasaun nian, ne’ebé partisipa husi Sra. Isabel de Lima, ne’ebé nu’udar reprezentante SEFOPE nian, ne’ebé mai atu partisipa graduasaun ne’e. Molok atu entrega sertifikadu iha diskursu badak husi Diretora Kursu Ir. Alexandrina Pinto FMA, ne’ebé koalia kona ba objetivu Kursu nian, aprezenta ba inan-aman sira oinsá hala’o ne’e no agradese mós ba Governo ne’ebé tulun atu bele realiza formasaun ida-ne’e ba foin-sa’e sira. Sra. Isabel mós iha ninia diskursu hato’o parabens ba Graduadu/a sira no husu atu sira uza didi’ak matenek sira ne’ebé sira hetan durante ne’e iha formasaun, no nia mós agradese ba Irrmán sira ne’ebé oferese fatin no liuliu hakarak atu ajuda foin-sa’e sira atu bele haburas iha sira nia moris.

Foin-sa’e sira ne’e sente kontente no agradese tebes tanba sira sente katak la’ós de’it matenek mak sira hetan maibé liuliu sira bele hametin liután sira-nia fiar sarani liuhusi formasaun sira. Inan-Aman sira mós sente kontente tanba ho formasaun ne’e.