Jezús husu beibeik atu institui Festa Divina Mizerikórda nian.

 

Husi  Santa Faustina Kowalska (1905-1938) nia “Diáriu”:

Iha kalan, bainhira iha ha’u-nia sela, ha’u haree Na’i Jezús ho hatais mutin: liman ida foti sa’e atu fó bensan, enkuantu liman seluk kona hatais iha hirus-matan, nakloke uitoan ba sorin hasai raiu boot rua, iha mean no seluk kamutis. Iha nonok ha’u nia matan fihir Na’i; ha’u-nia klamar nakonu ho hamta’uk. Maibé mós ho ksolok boot. Liutiha momentu ida, Jezús dehan mai ha’u: «Pinta imajen ida tuir modelu ne’ebé ó haree, no iha okos hakerek: Jezús ha’u konfia iha Ita! Ha’u hakarak atu venera imajen ne’e iha imi-nia kapela no hafoin iha mundu tomak. Ha’u promete katak klamar ne’ebé venera imajen ne’e, sei la lakon. Ha’u promete mós katak iha ona rai ne’e, maibé liuliu iha oras mate nian, vitória hasoru inimigu sira. Ha’u rasik sei defende  nia nu’udar Ha’u-nia glória rasik». Bainhira ha’u ko’alia ba konfesór, ha’u simu resposta ida-ne’e: «Ida-ne’e kona-ba ó-nia klamar». Nia dehan mai ha’u nune’e: “Ó pinta imajen divina iha ó-nia klamar”. Bainhira ha’u husik konfesionáriu, ha’u rona filafali liafuan sira-ne’e: «Ha’u-nia imajen iha ona ó-nia klamar. Ha’u hakarak atu iha festa ida Mizerikórdia nian. Ha’u hakarak atu imajen, ne’ebé ó sei pinta ho pinsél, sei benze ho modu solene iha domingu dahuluk depoizde Páskua; domingu ne’e tenke sai festa Mizerikórdia nian. Ha’u hakarak atu saserdote sira haklaken Ha’u-nia Mizerikórdia ba maksalak sira nia klamar. Ema maksalak labele ta’uk atu hakbesik mai Ha’u». «Ahi-lakan Mizerikórdia nian sunu Ha’u; ha’u hakarak hasuli ba ema sira nia klamar» (Diáriu- Q I parte I).

«Ha’u hakarak atu imajen ne’e hatudu ba públiku iha domingu dahuluk depoizde Páskua. Domingu ne’e mak festa Mizerikórdia nian. Liuhusi Liafuan halo-an ba ema ha’u halo ema hatene Ha’u-nia Mizerikórdia». Akontese duni ho modu milagrozu! Hanesa Na’i husu, omenajen dahuluk venerasaun nian ba imajen ne’e husi ema lubun-boot nia parte akontese iha domingu dahuluk depoizde Páskua. Ba loron tolu imajen ne’e hatudu ba públiku no sai objetu venerasaun públika. Imajen ne’e tau iha Ostra Brama iha janela aas ida, nune’e ema bele haree husi dook mós. Iha Ostra Brama selebra tríduu solene iha konkluzaun Jubileu Redensaun Mundu nian, ba sentenáriu XIX Paixaun Makso’in nian. Oras ne’e ha’u haree katak obra Redensaun nian liga ho obra Mizerikórdia ne’ebé Na’i husu (Diáriu Q I Parte I).

Rekollimentu misteriozu hakonu ha’u klamar no kontinua durante festa sira. Jezús nia amabilidade boot tebes, to’o labele deskreve nia. Loron tuirmai, depoizde Komuñaun, ha’u rona lian ne’e: «Ha’u-nia Oan-Feto, hateke ba Ha’u-nia Mizerikórdia nia profundidade no fó onra no glória ba Ha’u-nia Mizerikórdia ne’e no halo ho modu ida-ne’e: ó halibur ema maksalak sira mundu tomak nian no hatama iha Ha’u-nia Mizerikórdia nia profundidade. Ha’u hakarak fó An ba klamar sira. Ha’u hakarak klamar sira, ha’u oan feto. Iha loron Ha’u-nia festa nian, iha festa Mizerikórdia nian, ó sei liuhusi mundu tomak no lori klamar sira ne’ebé iha degradasaun laran ba bee-matan Ha’u-nia Mizerikórdia nian, Ha’u sei kura sira no sei fortifika sira» (Diáriu Q I parte III).

Bainhira konfesór fó orden mai ha’u atu husu ba Jezús sá loos signifikadu raiu rua iha imajen ne’e, ha’u hatán: «Di’ak, ha’u sei husu Na’i». Enkuantu ha’u harohan ha’u rona inteiromente liafuan sira-ne’e: «Raiu rua reprezenta Raan no Bee. Raiu kamutis reprezenta Bee ne’ebé justifika klamar sira; raiu mean reprezenta Raan ne’ebé fó moris ba klamar sira… Raiu rua hotu sai husi Ha’u-nia Mizerikódia nia íntimu, bainhira iha krús Ha’u-nia Fuan, iha agonia ona, ema sona borus ho diman. Raiu sira-ne’e defende klamar sira husi Ha’u Aman nia hirus. Rahun-di’ak ba ema ne’ebé moris iha sira-nia lalatak okos, basá Maromak nia liman ne’ebé justu sei la kona nia. Ha’u hakarak atu domingu dahuluk depoizde Páskua sai Festa Mizerikórdia nian. + Husu ba H’a’u nia atan fiél atu iha loron ne’e ko’alia ba mundu tomak kona-ba Ha’u-nia Mizerikórdia boot: iha loron ne’e, ema ne’ebé hakbesik ba bee-matan moris nian sira sei hetan perdaun totál ba salan sira no kastigu sira.  + Umanidade sei la hetan dame, bainhira sei la dirije ho konfiansa ba Ha’u-nia Mizerikórdia». (Diáriu Q I parte III)

Irmán Faustina hetan rezisténsia barak, basá, hanesan nia konfesór padre Miguel Sopocko dehan ba nia, festa Divina Mizerikórdia eziste ona iha Polónia no selebra iha fulan Setembru nia klaran. Nia konfia ninia laran rua-rua ba Jezús ne’ebé insiste katak imajen tenke benze solenemente no simu kultu públiku iha domingu dahuluk depoizde Páskua, atu klamar hotu bele iha konxiénsia no hatene kona-ba ne’e.

Papa S. João Paulo II mak sei aseita tomak Jezús nia pedidu ne’e. Ninia ensíklika sira: “Redemptor Hominis” no  “Dives in Misericordia” revela Bibi-Atan nia laran-taridu no esprime ninia konviksaun katak kultu ba Divina Mizerikórdia reprezenta “meja salvasaun nian” ba umanidade. Nia hakerek: “Hetok konxiénsia umana, hodi hakruuk ba sekularizasaun, lakon sentidu kona-ba signifikadu liafuan «miserikórdia nian», hetok nia hodi sai dook liután husi Maromak, hadook an husi mistériu mizerikórdia nian, Kreda iha direitu no devér liután atu halo apelu ba Maromak nia mizerkórdia ho «hakilar maka’as». «Hakilar maka’as» ne’e tenke sai Kreda ita-nia tempu nia hakilar, dirije ba Maromak atu husu ninia mizerikórdia, ne’ebé ninia manifestasaun loloos nia profesa no haklaken nu’udar akontese iha Jezús hedi iha krús no moris hi’as, katak iha mistériu paskál. Mistériu ne’e mak lori iha nia revelasaun kompleta mizerikórdia nian, katak domin ne’ebé maka’as liu mate, maka’as liu salan no aat hotu, domin ne’ebé hasai ema husi ne’ebé monu iha kuak-naruk no liberta nia husi ameasa boot liu” ( Dives in Misericordia VIII-15).

Iha 30 Abríl 2000, ho Santa Faustina Kowalska nia kanonizasaun, Papa S. João Paulo II institui ofisialmente  Festa Divina Mizerkórdia nian ba Kreda tomak, hodi fiksa nia data iha domingu daruak Páskua nian.

“Nune’e, importante mai ita atu simu mensajen tomak ne’ebé mai husi Maromak nia Liafuan iha Domingu II Páskua nian, ne’ebé husi ohin ba oin iha Kreda tomak sei foti naran “Domingu Divina mizerkórdia nian”.