Dili – Iha komunidade Eusebia Palomino (Dili) iha menina na’in tolu: Joana, Crescencia no Isaura, ne’ebé halo esperiénsia vokasional. Sira na’in tolu husi Quelicai hotu no hahú esperiénsia iha fulan Fevereiru 2022 nia rohan. Iha esperiénsia ne’e, sira buka koñese di’ak moris relijioza FMA nian, komunidade no misaun.

Ohin, 23 Abríl 2022, sira aprende halo lectio divina. Iha dadeer Ir Jacinta Gusmão aprezenta tiha ain-hakat sira lectio nian no iha tempu orasaun loraik sira pratika.

Pasajen bíblika mak Evanjellu Domingu II Páskua nian: Jo 20,19-31.

Pasu sira Letio nian mak hanesan tuirmai ne’e:

• Ambientasaun no invokasaun inisiál ba Espíritu Santu.  Kria ambiente esteriór atu tulun ba dispozisaun interiór simu Liafuan nian. Porezemplu, tuur iha sírkulu, haleu meza iha-ne’ebé iha Sagrada Eskritura, ho lilin lakan ida. Halo silénsiu no hahú ho knananuk eh orasaun invokasaun nian ba Espíritu Santu.
• Proklamasaun Liafuan nian.  Leitura. Rona ho atensaun. Fó tempu silénsiu depoizde proklamasaun atu ema ida-idak bele simu no halo ligasaun ho mensajen ne’ebé nia simu husi testu,¿sá loos nia konteúdu?, ¿Saida mak akontese? ¿Sá loos personajen sira no saida mak sira halo (se iha)?
• Meditasaun. Interroga testu ¿Saida mak nia dehan mai ha’u? ¿Saida mak nia dehan mai ita?  Ba momentu ida-ne’e bele halo reflesaun giada, maibé la naruk. Importante mak rona Liafuan iha fuan rasik: ¿Saida mak husi testu ne’e dada ha’u-nia atensaun? ¿Saida mak nia dehan mai ha’u? ¿Saida mak impresiona ha’u?
• Orasaun. Harohan husi testu ¿Sá mak ha’u hatán ba Maromak?  “Harohan mak amizade ho ida-ne’ebé ita hatene hadomi ita” – Santa Teresa de Jezús dehan. Diriji ba Aman, ba Jezús, ba Espíritu… ko’alia ho Nia, haktuir ba Nia saida mak ita hakarak eh sente. ¿Saida mak ha’u rai iha fuan, saida mak ha’u hakarak dehan ba Nia?
• Kontemplasaun. Halo silénsiu interiór, remata tiha orasaun, sente Maromak-Domin akompaña no hateke mai ita, iha ne’e no oras ne’e, ita-nia klamar fihir Nia, Trindade ne’ebé laran-di’ak no laran-sadia rohan-laek, haktuir hotu ba Nia no nafatin nakloke, hanesan Maria, ba Espíritu.
• Partilla. Fahe ho sira seluk buat ne’ebé Liafuan hamosu iha ha’u. Rona buat ne’ebé ema selukd ehan. Halo diálogu.
• Kompromisu-Asaun. Atua hahú husi testu. Buka atitude ida atu moris tuir: ¿Saida ha’u sei halo atu moris iha konkretu Liafuan ne’e? ¿Ha’u sei haka’as an iha saida loos atu halo sai realidade testu ne’e nia mensajen? ¿Saida mak ha’u bele halo, oinsá ha’u tenke hatán ba Jezús nia bolun?