Venilale – Loron komemorasaun ba konsultasaun popular Timor-Leste nian ne’ebé akontese iha loron 30 de Agosto de 2014, sai momentu istóriku ida ba ETP- Madre Mazzarello  Venilale, basá, simu responsabilidade husi autoridades lokál atu halo rame loron istóriku ida ne’e, hodi halo Expo, atu hatudu estudante sira nia kapasidade atu fa’an produtu ne’ebé sira rasik halo no prepara tuir sira nia espesializasaun. Estudante Técnico-Alimentar prepara aihan oioin, dosi ho tipu oin-oin mós, bebida ho kualidade  maibé ho folin baratu.

Estudante Hotelaria fali, demostra sira nia maneira atu serví tanba sira mak kandidata ba servisu iha Restaurante no Bar sira. Atividade  hirak ne’e hahú iha tuku 10 dadeer  hafoin remata iha tuku 21. 00 kalan.

Iha loron ne’e Komandante PNTL Sub – Distritu Venilale mós hetan fatin uluk liu atu mai koko hahán ne’ebé prepara husi estudante sira. Iha mós F-FDTL ne’ebé mai atu partisipa iha atividade loron komemorasaun Konsulta Popular, sira mós iha interese boot atu mai koko hahán no bebida sira ne’ebé ho folin baratu tebes. Iha parte Profesór/a na’in 5 nian, ho sira nia profisionalidade no kompeténsia, hatudu sira nia disponibilidade, boa-vontade no entuziazmu  hodi akompaña estudante sira durante loron tomak, hodi dispoin sira nia tempu no enerjia atu halo loron ida ne’e sai loron espesiál liu.

Partisipasaun ne’ebé estudante sira, profesór/a sira no Irmán sira tuir iha loron ida ne’e atu komemora loron istoriku, halo ami konxiente ba Don Bosco nia mehi ba joven sira  atu “SAI SARANI NE’EBÉ DI’AK NO SIDADAUN NE’EBÉ ONESTU”. Administradór Sub-Distritu Venilale haksolok no orgullu ba partisipasaun másima husi ETP. ST. Maria Mazzarello, Venilale, no hein katak sira sei konvida nafatin wainhira iha tan okaziaun ruma ne’ebé atu hatudu ita nia foinsae sira nia kualidade no espesialista.

Husi parte autoridade sira, atu halo rame loron ida ne’e, sira mós organiza atividades lubuk ida husi parte Espirituál nian, sira hahú loron ida ne’e ho selebrasaun Eukaristia iha Igreja Sagrado Coração de Jesus Venilale, hafoin kontinua ho marxa husi Eskola sira hotu ne’ebé iha Venilale laran hahú husi SD to’o SMA. Kontinua no fahe prezente ba suku walu iha Venilale nia laran. Prezente ne’e hanesan instrumentu muzikál nian, doasaun husi funsionáriu sira Venilale oan sira ne’ebé  tuur iha Dili, Baucau no venilale rasik. Atividade kontinua ho jogu sira, dada tali no jogu amizade entre F-FDTL ho funsionáriu Venilale nian.

Expo ne’e akontese ba dala rua ona iha fulan Agostu nia laran. Ida uluk liu akontese iha lorn 7 Agostu, tanba estudante sira halo Ezame prátika nune’e atu fó koñesimentu ba sira nia valór prátika halo Expo ne’e. Iha momentu ne’e, Senhor Ramos Horta mós prezente iha momentu ida ne’e, hodi asiste no haree hahán no dosi sira ne’ebé estudante sira prepara ho kualidade boot tebes. Molok atu fila  sira sosa mós hahán balun atu lori ba uma. Natoon ne’e, povu Venilale mós iha interese atu koko buat ne’ebé estudante prepara.