LORON TERSA SANTA

Leitura: Jo  13,21-33.36-38

Ita iha narrasaun han-kalan ikus nian ne’ebé loke loron tolu Paixaun nian, Jezús deside fó moris ba ninian sira no entre sira-ne’e iha Judas, ida ne’ebé rejeita no halo traisaun; iha ne’e iha salan, iha ita hotu. Diálogu ho Judas iha funsaun atu revela ho modu priviliejiadu katak sá hadomi to’o rohan ba Jezús. Fasil atu hadomi ema ne’ebé hadomi ita, Problema mak sá loos mak ita-nia domin halo bainhira iha ema sira ne’ebé rai kunan, odeia ita no faan ita…

«Dehan tiha ne’e hotu, Jezús nia laran taridu hodi fó sasin: “Tebes, tebes, Ha’u dehan ba imi katak imi ida sei saran Ha’u.” Eskolante sira hateke ba malu hodi hanoin Nia ko’alia kona ba sé loos. Eskolante ida ne’ebé Jezús hadomi tur besik nia sorin. Ne’e duni, Simaun Pedro halo sinal ida ba nia, dehan: “Husu to’ok , Nia dehan sé loos!”  Nia sadere ba Jezús nia hirus matan hodi husu: “Sé loos, Na’i?” Jezús hatán: “Nia mak ida ne’ebé Ha’u sei fó paun ne’ebé Ha’u sei habokon.” Hafoin, habokon tiha paun baluk ida, Nia fó ba Judas, Simaun Iscariotes nia oan. Paun simu tiha, diabu tama iha Judas nia laran. Jezús dehan ba nia: “Buat ne’ebé ó atu halo, halo lalais ba!” Sira ne’ebé tur iha meza la hatene tansá Jezús dehan nune’e ba nia. Tanba Judas kaer kohe osan nian, sira balun hanoin katak Jezús dehan ba nia: “Ó ba sosa buat ne’ebé ita kuran ba festa;” eh haruka nia fó esmola ba ema kiak sira. Simu tiha paun baluk ne’e, Judas sai kedas. Kalan ona.

Judas sai tiha, Jezús dehan: “Ohin Oan Mane simu glória, no Maromak sei simu glória iha Nia. Maromak simu karik glória iha Oan Mane, Maromak mós sei fó glória ba Nia iha Nia An rasik no sei fó glória kedas ba Nia. Kosok-oan sira, tempu uitoan de’it ona mak Ha’u sei hela ho imi. Imi sei buka Ha’u, no hanesan Ha’u dehan ona ba Judeu sira, ohin Ha’u dehan ba imi: ‘Ba fatin ne’ebé Ha’u sei bá, imi la bele bá.’ Simaun Pedro dehan ba Jezús: “Na’i, Ita ba ne’ebé?” Jezús hatán: “Ohin ó la bele tuir Ha’u ba fatin ne’ebé Ha’u bá, maibé ó sei tuir aban bainrua.” Pedro simu dehan: “Na’i, tansa ha’u la bele tuir Ita ohin? Ha’u sei saran ha’u nia moris tanba Ita!” Jezús lia tun fali ba nia: “Ó sei saran ó nia moris tanba Ha’u? Tebes, tebes, Ha’u dehan ba ó katak molok manu kokorek, ó sei heli Ha’u dala tolu.”»

Meditasaun

Judas iha ne’ebá ho Jezús, Maibé luta loloos ne’e mak luta entre Jezús no satanás. Judas iha momentu ne’e mak dixípulu ne’ebé iha perigu laran. Dixípulu ne’ebé tenke foti desizaun difisil ida. No Jezús hatene. Judas iha satanás nia liman-kukun laran no tanba ne’e nia sai destinatáriu domin partikulár husi Jezús nia parte, ne’ebé ba Judas, fó paun habokon iha ninia bikan. Ne’e mak jestu típiku ida uma-na’in nian ne’ebé hatudu estima ba bainaka ilustre ka importante liu. Ne’e mak jestu ida amizade no akollimentu nian. Ho jestu ne’e Jezús revela sé mak traidór, maibé tempu hanesan perdua Judas hodi hadomi nia to’o rohan. Ba Judas, ne’ebé atu halo salan maibé seidauk halo, Jezús oferese ninia rekonsiliasaun, tanba fó ba nia paun amizade no domin nian, hodi hatudu lia-loos. Nia fó hodi hatudu ba Judas katak Nia hatene Judas planu hela traisaun. No Jezús denunsia, no paun baluk ne’e mak maklorik, la’ós kondenasaun nian maibé tulun nian, atu Judas komprende lia-loos no hahalok ne’ebé nia atu halo nia gravidade. Judas atu monu iha rai-kuak naruk no Jezús hakarak oferese posibilidade atu nia la monu iha kuak naruk nia laran, basá – maski oinsá bá mós – Jezús hadomi nia to’o rohan. No hadomi nia signifika tulun nia atu hasai máskara buat aat nian ne’ebé hatata no haterus klamar. Jezús desmakara Judas, la’ós atu kondena nia maibé atu tulun nia atu arrepende. Tan ne’e nia uza jestu ospitalidade no amizade nian: oferta paun-baluk habokon iha bikan. Jezús entrega nia moris iha Judas nia liman hodi perdua antes ona nia. No foti tiha paun-baluk, satanás tama iha nia. Judas trai hodi hatene katak nia trai hela: ne’e mak rai kuak-naruk ne’ebé hamta’uk maka’as, lori terr,ó buat aat ne’ebé ita halo hodi rejeita Maromak nia domin. Oras ne’e Mane Makso’in hetan glória; iha kalan nakukun liu rai-kunan no ódiu nian, Jezús hatudu Maromak nia Domin ne’ebé nia roman ne’ebé ema nunka haree.

Orasaun

Na’i Jezús, ita-nia domin ne’ebé soe estraga kura ha’u-nia rai-kunan hotu, ita-nia amizade mak avizu ida mai ha’u atu keta monu iha rai-kuak naruk salan nian hodi kaer metin ita-nia hakohak perdaun nian.