Venilale – 26 Marsu, atu bele realiza Santu Padre Papa Francisco ninia ensíklika Laudato Si, mak ami grupu Asosiasaun Laudato Si husi ETV Mazzarello Venilale, halo planu hodi envolve eskola sira ne’ebé eziste iha Postu Administrativu Venilale. Eskola sira ne’ebé envolve mak Eskola Sekundária Don Bosco Venilale, Eskola Sekundária Jerál Luga-Oli, EBC 3 síklu Uai-Bua, Aspirantadu Beatu Filipi Rinaldi Venilae, EBF Uatu- Haco no estudante ETV tomak. Ho objetivu husi atividade ne’e atu hatan ba rai nia hakilar nu’udar etapa dahuluk, no hatan ba ema kiak nia hakilar sei realiza iha fulan Abril mai.

Molok halo atividade Laudato Si, Ir. Elisita no profesora Maria Fatima Soares hamutuk ho grupu asosiasaun Laudato Si prepara formasaun bázika konaba Laudato Si hodi ba halo sosializasaun iha eskola sira. Eskola hirak ne’e hatan kedas ba ami-nia konvite no sira kontente tanba husi sosializasaun ne’e halo sira komprende no hatene saida mak Laudato Si no ho ninia objetivu sira, saida mak Papa husu ita atu halo nune’e bele hatan ba objetivu 7 Laudato Si nian.

Nune’e ohin dader tuku 8: 45 estudante sira halibur hamutuk iha eskola do reinu nia oin hodi halo orasaun hamutuk. Depois de orasaun kontinua kedas ho limpeza. Limpeza hahu husi Seminariu, eskola do reinu oin, resintu párokia, eskola ETV no husi Malubai to’o iha edifisiu Postu Administrativu Venilale nia oin. Hafoin iha ne’eba kontinua ho kuda ai-oan no prepara au hodi halo lutu husi eskola sira hotu ne’ebé envolve iha atividade ne’e. Ai-oan ne’ebé kuda atus rua resin, fatin sira ne’ebé kuda mak Postu Administrativu oin, eskola EBF Uatu- Haco, no Sekundáriu Jerál Públiku.

Depoisde kuda ai-oan, Sr. Miguel Administradór Venilale nian hato’o liafuan agradesimentu no dehan katak; ita nia serbisu hamutuk la to’o deit iha ne’e maibé ita kontinua hodi taumatan no kuida atu ai-oan ne’ebé ohin ita kuda ita bele hare nia rezultadu. Ita serbisu hamutuk ho Polisia atu taumatan ba ai-oan ne’e.

Ema sira ne’ebé inklui iha atividade ne’e la’ós estudante sira deit maibé mós irmán sira komunidade Madre Mazzarello nian, mestre/a ne’ebé akompana estudante sira no mós irmaun sira.

Agradese ba senhor administradór ne’ebé apoiu tebes atividade ne’e, ba mestre/a ne’ebé ho entuziasmu akompaña estudante sira. Ba ekipa Floresta ne’ebé oferese ai-oan hamutuk 326. Hamutuk ita kontinua sensibiliza estudante sira no sosiedade atu taumatan ba ita-nia UMA KOMUN.

(Ir. Elisita Gonzaga FMA)