Dili – Ho ksolok tebes madre sira, formande, foinsa’e sira no komunikadade edukativa simu Madre Alma Castagna ho dansa kultural liuhusi jestu simboliku Festa kazamentu iha Kana.  Hanesan iha Kana Jesus nakfilak bee ba tua, nune’e mos madre provincial nia presenza sei hakonu ho ami ida-idak ho tua ksolok nian, domin nian, familiaridade nian no liuliu hamanas nafatin ami nia domin ba Jesus no lori ami ba Jesus. Ida ne’e mak ami hotu nia hakarak diak hodi simu madre nia visita iha ami nia le’et. Madre Alma akompana husi Irman Konsileira sira Ir. Evangelina, Ir. Lanny, Ir. Julia no Ir. Esmeralda Soares, nu’udar kordenadora ba formasaun nian ne’ebe mai atu partisipa iha admisaun entrada Aspirante ba postulante.

Komunidade tomak haksolok la’os deit ho Madre Alma nia presenza maibe ba aspirante nain tolu: Abiuda Monteiro dos Reis, Geralda Soares da Conceicão no Meliana Soares Dau-Bui, ne’ebé ho fiar buka nafatin Maromak nia hakarak iha etapa Postulantado nian, tuir karisma Don Bosco no Madre Mazzarello nian. Sira hili pasajen evangelho São João nian “imi hadomi malu hanesan Ha’u hadomi imi” (Jo.15:12), nu’udar sira nia simbol mak Jesus Futar fuan santo. Iha Madre Alma nia mensajen ba sira dehan “ho simbol Jesus futar fuan santu hatudu domin ida ne’ebe la’os romantiku deit maibe domin ida ne’ebe loos no fiel to’o rohan”. Iha sira nia preparasaun molok too ba selebrasaun ohin nian, loron ida antes sira hala’o retiro iha Irmas SCMM-Manleuana nia komunidade atu bele halo silensio no medita konaba Lectio anunsiasaun nian.   Iha perguntas sira ne’ebe tulun atu hakle’an sira nia vokasaun hodi kompara ho Maria nia vokasaun ho tempu hanesan sira mos hakbesik an ba Sakramentu Rekonsiliasaun.

Post. Geralda dehan ”ha’u agradese Maromak ba grasa ne’ebe hau simu liuliu grasa vokasaun nian ne’e, hau bele deskobre liutan Maromak Nia domin mai hau”. Hanesan mos ho sira nain rua seluk ne’ebe haksolok tebes no agradese ba Kongregasaun nia laran luak ne’ebe simu sira ba etapa postulantadu nian. No sira husu atu kontinua apoio sira ho orasaun atu sira aten brani no entusiasmo nafatin iha sira nia prosesu formasaun nian.

(Maria Angelita Gomes FMA)