Dili – Iha Don Bosco Komoro-Dili, ohin, 20 Marsu 2022, ami halo enkontru Zonál ho tópiku “Halo buat hotu ho domin, la’ós tanba obriga” (Estréia 2022), ne’ebé lidera husi Delegadu Pastorál Juvenil SDB no FMA, Pe. Nelson, SDB no Ir Julia, FMA. Partisipante sira mai husi Sentru Oratóriu hotu SDB no FMA nian iha Dili laran hamutuk 88 inklui Irmán sira, Frater sira no Novisa sira. Iha mós enkontru via online ho Animadór/a sira iha Maliana.

Enkontru hahú ho simu partisipante sira, animasaun, jogu, reflesaun husi Pe. Nelson kona ba Estréia 2022 nian, reflesaun pesoál, partilla reflesaun iha grupu no taka ho Selebrasaun Eukarístika ne’ebé prezide husi Pe. Nelson rasik.

Pe. Nelson dehan: “Iha Estréia ko’alia kona-ba domin. Simu domin no fó domin, maibé dala barak ita uza sala nia tanba wainhira ko’alia kona-ba domin ita nia hanoin halai liu ba seksualidade. Maibé loloos domin ne’e tulun ita atu halo d’iak ba malu. Domin la’ós possesivu no siumentu lori ta’uk tanba lakon ema ne’ebé ita hadomi no sente inseguru. Loloos domin tenke iha liberdade, respeita no pasiénsia hodi hein katak ema sei bele muda.

Tuir Papa Bento XVI nia hanoin iha ensíklika “Deus Caritas est”, katak Domin fahe ba parte Tolu mak hanesan: Domin Eros signifika domin entre feto no mane, domin iha fuan; domin filia signifika domin entre amigu/a, katak ó fó ha’u mós fó; domin agape signifika domin entre Maromak ho ema”. Tuir Saun Francisco de Sales, katak: “É o amor que dá o valor a todas as nossas obras”. Atu dehan katak, iha buat hotu ne’ebé ita halo, fó valór nafatin maski ki’ik.

Sira hotu iha entuziasmu boot atu rona, reflete no fahe sira nia hanoin kona ba saida mak DOMIN.

Sira balun “Domin ne’ebé iha mak Jezús nia domin ba ita. Domin hanesan buat ne’ebé ema hotu presiza, laos tan obsesaun ne’ebé halo ema sai egoista. Hanesan animadór/a, ita presiza simu mós kondisaun ne’ebé labarik hirak iha bá tanba domin.

Furak tebes haree foin-sa’e sira ne’ebé sei hakarak atu fó sira nia tempu, sira nia-an no sira ksolok atu anima labarik no maluk foin-sa’e sira iha Sentru Oratóriu ida-idak. Maromak sei rekompensa imi nia d’iak hotu ne’ebé imi halo ona.

(Noemia de Deus FMA)